पोखरा, २३ वैशाख । कास्कीको अन्नपूर्ण गाउँपालिका वडा नंं ३ मा रहेको मराम्चे सामुदायिक बनमा आगलागी गरेको आरोपमा प्रहरीले अगन्दर पौडेललाई पक्राउ गरेको छ ।

पक्राउ परेका स्थानीय ३९ वर्षीय पौडेललाई थप अनुसन्धान तथा कारवाहीका लागि डिभिजन वन कार्यालय कास्की बगरमा पठाईएको कास्की प्रहरीका सूचना अधिकारी प्रहरी नायव उपरिक्षक बसन्तकुमार शर्माले जानकारी दिएका छन् ।

पक्राउ परेका पौडेलले सामुदायिक जंगल नजिकै रहेको आफ्नो खरबारी पाखोमा सुकेको घसेटामा आगो लगाएकोमा उक्त आगो अनियन्त्रित भई सामुदायिक वनमा आगलागी हुन पुगेको प्रारम्भिक सोधपुछका क्रममा खुलाएको सूचना अधिकारी शर्माले बताए । वनहरुमा आगलागीका घटना बढेसँगैं कास्की प्रहरीले सार्वजनिक सूचना नैं जारी गरी यस्तो कार्य नगर्न र गरेमा कानुनी कारवाही गर्ने चेतावनी दिदैं आईरहेको थियो ।