पोखरा, २३ मंसिर । प्रहरीले ठगी गरेको भन्दै पोखरा महानगरपालिका वडा नं. ६ का वडासदस्यसहित ४ जनालाई पक्राउ गरेको छ । लेकसाईडस्थित फेवातालको किनारमा रहेको फुटट्रयाकमा फोटोग्राफी गरे वापत भन्दै धम्क्याउँदै रकम उठाउने गरेको आरोपमा प्रहरीले पक्राउ गरेको हो ।

प्रहरीले पोखरा–६ घर भएका वडा सदस्य ४२ वर्षीय दीपेन्द्र पहारी, सोही ठाउँ बस्ने ४१ वर्षीय विकास पहारी, २२ वर्षीय प्रवीन विश्वकर्मा र २४ वर्षीय अभिषेक परियार तथा अप्पे भनिने अभिषेक बराललाई पक्राउ गरेको जिल्ला प्रहरी कार्यालय कास्कीले पठाएको ईमेलमा उल्लेख छ ।

फुटट्रायकमा फोटोग्राफी गरे बापत मिलन पहारी समेतले विभिन्न किसिमबाट धम्काई प्रतिव्यक्ति १३ हजार पाँचसय रुपैयाँ लिएको र आफ्नो नाउँमा फोटोग्राफी व्यवसाय दर्ता नगरी ठगी गरेको भन्दैं १५ जना व्यक्तिहरुले दिएको जाहेरीका आधारमा जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको टोलीले वडासदस्य चारजनालाई पक्राउ गरेको हो ।

पक्राउ परेका व्यक्तिहरुलाई जिल्ला अदालत कास्कीबाट ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी मुद्दामा दिन १० म्याद थप गरी अन्य अनुसन्धान प्रकृया अगाडी बढाइएको कास्की प्रहरीले जानकारी दिएको छ ।