काठमाडौं, १२ असार । शिवशिखर र तुलसी सहकारीको अर्बौं रुपैयाँ ठगी गरेर फरार रहेका केदारनाथ शर्मा न्यौपानेलाई प्रहरीले भारतबाट पक्राउ गरेको छ । नेपाल प्रहरीको केन्द्रीय अनुसन्धान ब्यूरो (सीआइबी)ले न्यौपानेलाई भारतको मुम्बईबाट पक्राउ गरेको जनाएको छ । यस अघि प्रहरीले उनकी पत्नीसहित दुईजनालाई पक्राउ गरिसकेको थियो ।

शिवशिखर र तुलसी सहकारीमा सर्वसाधारणले जम्मा गरेको १४ अर्बभन्दा बढी रकम हिनामिना गर्ने मुख्य नाईके न्यौपाने भागेर भारतमा लुक्दै बसेका थिए । प्रहरीका अनुसार उनी भारतमा त्यहाँको एक विधायकको घरमा लुकेर बसेका थिए । उनलाई भारतीय प्रहरीको सहयोगमा सीआईबीको टोलीले सोमबार पक्राउ गरी नेपाल ल्याएको हो ।

शर्मा नेतृत्वमा रहेको शिव शिखर सहकारी र तुलसी सहकारीले सर्वसाधारणको १४ अर्बभन्दा बढी निक्षेप हिनामिना गरेको मुद्दा अदालतमा विचाराधीन रहेको छ । उक्त हिनामिनाको मुख्य नाइके नैं शर्मा भएको अनुसन्धानबाट देखिएपछि उनलाई भक्तपुर र मोरङमा मुद्दा दायर गरिएको थियो।

बाँके कोहलपुर स्थायी घर भएका न्यौपानेले सहकारीबाट ठगेको रकम भारतको राजस्थानलगायत ठाउँमा चामलको व्यापार गर्न र अर्थ न्यूज टेलिभिजनमा लगानी गरेका थिए । सहकारीको पैसा निजी कम्पनीका लगानी गरेका न्यौपानेले नेपालमा उपकार ब्रान्डको चामलको व्यापार गर्दै आईरहेका थिए ।