पोखरा, ९ माघ । गण्डकी प्रदेशमा आज सोमबार विहान बसेको मन्त्रिपरिषद्को बैठकले ५ वटा मन्त्रालय घटाउने निर्णय गरेको छ । १२ वटा मन्त्रालयबाट ७ वटामा झार्ने निर्णय गरेसँगैं मन्त्री बन्न लर्को लागेर बसेका सांसदहरु दंग परेका छन् ।

सत्तारुढ दलबीच मन्त्रालयको भागवण्डा नमिलेकै अवस्थामा मन्त्रिपरिषद्को आज बसेको बैठकले अब तीनजनामात्र मन्त्री थप गर्ने भएको छ । सत्ता साझेदार दलका ३१ सांसदमध्ये एमाले दलका नेता खगराज अधिकारी मुख्यमन्त्री, माओवादी केन्द्रका संसदीय दलका नेता हरिबहादुर चुमान र राप्रपाका प्रदेश अध्यक्ष एवं सांसद पञ्चराम गुरुङ मन्त्री नियुक्त भईसकेका छन् । साथै माओवादी केन्द्रका सांसद कृष्ण धिताल सभामुख निर्वाचित भईसकेका छन् । बाँकी मन्त्रीहरुले भने अहिलेसम्म मन्त्रालयको जिम्मेवारी पाएका छैनन् ।

६० सदस्य रहेको गण्डकी प्रदेश सभामा सत्ता साझेदार दलहरू एमाले, माओवादी केन्द्र र राप्रपाका गरी ३१ जना मात्र सांसद रहेका छन् । जसमा कांग्रेसको २७ जना र एकजना स्वतन्त्र सांसद रहेका छन् ।

मन्त्रालयको संख्या घटाइएपछि मन्त्री बन्ने सम्भावना नदेखेका सांसदले भने अब प्रदेश सभाका पदाधिकारीतर्फ आफ्नो लविङ अघि बढाएका छन् । गण्डकी प्रदेश सभामा ४ वटा संसदीय समिति छन् । समितिका सभापति र संसदीय दलका पदाधिकारी बन्न सांसदहरूको दौडधुप शुरु भएको छ । साथै मन्त्रालय बाँडफाँडका विषयमा छलफल गर्न माओवादी केन्द्रले संसदीय दलको बैठक आहवान समेत गरिसकेको छ ।