पोखरा, २ भदौं । गत साउन २ गते पोखरा महानगरपालिका वडा नं. २६ अर्घौंचोकमा रहेको एनएमबी बैंकको एटिएम विना हातहतियार खोलेर त्यहाँ भएको नगद चोरी गर्ने अनिश तामाङलाई गण्डकी प्रदेश प्रहरी कार्यालय र डाँडाको नाक प्रहरी चौकीको टोलीले पक्राउ गरेको छ ।

अन्दाजी २४ वर्षका तामाङलाई प्रहरीले लेखनाथको कुलाको मुखबाट पक्राउ गरेको हो । तामाङले विना हातहतियार एटिएमको बक्स खोलेर त्यहाँ भएको १४ लाख ७१ हजार पाँचसय रुपैयाँ चोरी गरेका थिए ।

वैशाखदेखि यता ४ पटकसम्म एटिएम मेसिन फोडेर रकम निकाल्ने प्रयास भएको थियो । जसमध्ये प्रहरीले अन्य ठाउँमा तत्कालै पक्राउ गर्न सफल भएपनि लेखनाथको अर्घौंचोकको घटनामा भने कुनै पनि सुराक भेट्न सकेको थिएन ।

लेखनाथको घटनामा प्रहरीले पक्राउ गर्न सकेन कि ध्यान दिएन भन्ने प्रश्न गर्दा पत्रकार विजय नेपालीलाई जिल्ला प्रहरी कार्यालय कास्कीका डिएसपी सुन्दर तिवारीले हर्कादैं भनेका थिए–‘तपाईँलाई के लाग्छ ? ध्यान गएन जस्तो लाग्छ ? जोडबल गरेर लागे कस्तो हुन्छ, नलागे कस्तो हुन्छ ? मलाई बताइदिनुस न, तपाईंले आधार के देख्नुभयो ?’

कुनै पनि आधार नै नभेटेको कास्की प्रहरीले यस विषयमा उमेश तामाङ पक्राउ परेसँगैं छिट्टैं नैं पत्रकार सम्मेलनको आयोजना भने गर्दैछ । गण्डकी प्रदेश प्रहरी कार्यालयमा नयाँ डिआईजी रामदत्त जोशी आएसँगैं कास्की प्रहरीले फुकाउन नसकेको गाँठो प्रदेश र डाँडाको नाक प्रहरी चौकीको टोलीको सक्रियतामा सफलता मिलेको हो ।