काठमाडौँ, १४ वैशाख । नेपाली कांग्रेसका नेता शेखर कोइरालाले स्थानीय तहको निर्वाचनमा टिकट वितरणमा आर्थिक चलखेल र अनियमितता भएको भन्दै पार्टी नेतृत्वको चर्को आलोचना गरेका छन् । निर्वाचनपछि पार्टी भित्र भएका विकृति, विसंगति र आर्थिक चलखेलको सबै पक्षको समग्र समीक्षा गरिने नेता कोइरालाले बताएका छन् ।

नेता कोइरालाले बुधबार जारी गरेको विज्ञप्तिमा राज्य र पार्टी संयन्त्र दुरुपयोग गरी धेरै नेता/कार्यकर्ताहरूको राजनीतिक हत्या गर्ने षड्यन्त्र भएको समेत आरोप लगाएका छन् । उनले भनेका छन्, ’सबैभन्दा दुःखको कुरा त आफूसँग असहमत भएकै कारण कैयन साथीहरुको राजनीतिक जीवन समाप्त पार्ने योजनाबद्ध प्रयत्नहरु भएका छन् । कैयन साथीहरुलाई राज्य र पार्टी संयन्त्रको दुरुपयोग गरी अनेकन जालझेल मुद्दामा फसाएर तिनको राजनीतिक हत्या गर्ने षड्यन्त्र पनि भएका छन् । पार्टीभित्र रहेका यस्ता गलत कार्यहरु तत्काल अन्त्य हुनुपर्छ ।’

नेता कोइरालाले टिकट वितरण प्रक्रियामा कुन मापदण्ड अपनाइयो भन्दै प्रश्नसमेत गरेका छन् । उनले भनेका छन्, ’कांग्रेस केन्द्रीय कार्यसमितिमा टिकट वितरण प्रक्रियामा कुन मापदण्ड अपनाइयो त्यसको अध्ययन, अनुसन्धान र समीक्षासमेत गरिने छ भनेर म साथीहरुलाई विश्वस्त पार्न चाहन्छु ।’

कांग्रेसबाट स्थानीय तहमा उम्मेदवारी दिन इच्छुक योग्य र सक्षम नेता÷कार्यकर्ताहरुलाई टिकट वितरणमा समानरुपले नेतृत्वले न्याय गर्न नसकेको उनले विज्ञप्तिमा उल्लेख गरेका छन् । टिकट वितरणमा एउटा मापदण्ड बनाइ अगाडि बढ्दा सबैप्रति न्याय गर्न सकिने कुरा आफूले बारम्बार उठाए पनि ध्यानपूर्वक नसुनिएको उनले बताएका छन् ।