पोखरा, ५ वैशाख । नेपाल कम्युनिष्ट पार्टी माओवादी केन्द्रले पोखरा महानगरपालिकाको मेयर र उपमेयरमा ३/३ जनाको नाम सिफारिस गरेको छ । माओवादी केन्द्रको पोखरा महानगर कमिटीको आज बसेको पूर्ण बैठकले सर्वसम्मत रुपमा नाम सिफारिस गरेको हो ।

पोखराको मेयरमा बखानसिंह गुरुङ, विश्वप्रकाश लामिछाने र सीता खड्काको नाम प्रदेश कमिटीमा सिफारिस गरिएको छ । त्यसैगरी उपमेयरमा गोमा ढकाल, सिर्जना त्रिपाठी र सूर्यप्रकाश तिवारीको नाम सिफारिस गरिएको कमिटीका उपाध्यक्ष भानुभक्त अधिकारीले जानकारी दिए ।

मेयरमा सिफारिस गरिएका गुरुङ पार्टीका कास्की संयोजक हुन् । लामिछाने पोखरा उपत्यका नगर विकास समितिका पूर्वअध्यक्ष, प्रदेश कमिटीका सदस्य, महानगरका निर्वतमान अध्यक्ष र यस अघिको स्थानीय निर्वाचनमा मेयरको दावेदारका रुपमा चुनावी मैदानमा उत्रिएका तर भरतपुरमा कांग्रेससँग भएको सम्झौंताका कारण पछि हटेका पात्र हुन् । महिला नेतृ खड्का जनयुद्धका बेलामा जनमुक्ति सेनाको कम्पनी कमाण्डर र अहिले गण्डकी प्रदेशको सदस्य रहेकी छिन् ।

त्यसैगरी, ढकाल यस अघिको स्थानीय चुनावमा माआवोदी केन्द्रका तर्फबाट पोखराको उपमेयरको दावेदार थिईन् । त्यसैगरी माओवादीको जनवर्गीय संगठन अखिल नेपाल महिला संघ (क्रान्तिकारी) की केन्द्रीय सदस्य त्रिपाठी प्रचण्डकी बुहारी भएपनि पछिल्लो समय पोखरामा नैं बसेर पार्टी राजनीतिमा सक्रिय महिला नेतृ हुन् ।