पोखरा, ५ वैशाख । सत्तारुढ गठबन्धन मध्येको एक दल नेकपा (एकीकृत समाजवादी)ले पोखरा महानगरपालिकाको मेयर आफूले पाउनु पर्ने अडान राखिरहँदा मेयरका १४ र उपमेयरमा ४ जना आकांक्षीको नाम सिफारिस गरेको छ ।

समाजवादी पार्टीले पोखरा महानगरसहित कास्कीमा ४ वटै गाउँपालिकाका वडा अध्यक्ष र ४ जना सदस्यको नाम समेत सिफारिस गरेको छ । जिल्ला कमिटीले जिल्लाभरका ७२ वटै वडाको आकांक्षीका नाम सिफारिस गरिसकेको एकीकृत समाजवादी पार्टी कास्कीका अध्यक्ष धनराज आचार्यले जानकारी दिए ।

पार्टीको महानगर कमिटीले पोखरा महानगरपालिकाको मेयरमा पुराना तथा इमान्दार कम्युनिष्ट नेता श्रीनाथ बराल, एकीकृत समाजवादीका जिल्ला अध्यक्ष धनराज आचार्य, दामोदर शर्मा, विजयबाबु बनबासी, मदनकाजी श्रेष्ठ, प्रेम थापा, दिलु पन्त, नारायण बाँस्तोला, चित्रप्रसाद आचार्य, दुर्गाप्रसाद सुवेदी, भिमा पौडेल, नवराज अधिकारी, दाताराम आचार्य र देवेन्द्र बास्तोलाको नाम सिफारिस गरेको छ ।

त्यसैगरी, उपमेयरमा होम नेपाली, पूर्ण लामा, संगीता केसी र महेन्द्रकुमार गुरुङको नाम सिफारिस गरेको छ ।

समाजवादी पार्टीले मेयर र उपमेयरका आकांक्षीले वैशाख ६ गतेसम्म उमेदवार दावी गर्न पाउने छन् । एकीकृत समाजवादी पार्टीका कास्की जिल्ला अध्यक्ष आचार्यले भने–‘प्रदेश कमिटीसमक्ष अझै पनि उम्मेदवार दाबी गर्न सकिन्छ । प्रदेश कमिटीले ६ गते केन्द्रलाई सिफारिस गर्छ ।’

‘गठबन्धनको निर्णय अनुसार पार्टीले पाउने ठाउँमा हामीले सिफारिस गरेका व्यक्ति नै उम्मेदवार हुन्छ,’ अध्यक्ष आचार्यले भने, ‘पार्टीको आन्तरिक तयारीका रूपमा उम्मेदवार सिफारिस गरेका हौं ।’