पोखरा, २९ चैत । नेपाली कांग्रेसका पूर्वमन्त्री यज्ञबहादुर थापाको नेतृत्वमा पोखरा महानगरपालिकाको मेयर नछोड्न दवाव दिनका लागि कास्कीका नेताहरु यतिबेला काठमाडौं पुगेका छन् । सत्तारुढ गठबन्धनमा पोखरा महानगरपालिकाको मेयर एकीकृत समाजवादीले दावी गरेपछि कांग्रेसी नेताहरु डेलिगेसनका लागि काठमाडौं गएका हुन् ।

कांग्रेसका सभापति शेरबहादुर देउवालगायतका शीर्ष नेताहरुलाई भेटेर पोखरा महानगरपालिकाको मेयर कुनै पनि हालतमा छोड्न नसकिने अडान राख्नेछ । पूर्वमन्त्री थापाले भने–‘पोखरामा कांग्रेस एकदमैं बलियो छ । यस्तो अवस्थामा अरुलाई जिताउनु भनेको सुसाईड जस्तै हो । अरु पदमा सहमति गर्न सकिन्छ, मेयर छोड्न सकिदैंन ।’

सत्ता गठबन्धनमा आवद्ध नेकपा माओवादी केन्द्र, नेकपा एकीकृत समाजवादी र जनता समाजवादी पार्टीका नेताहरुले कांग्रेसलाई ३ महानगर लिएर गठबन्धनका अरु दलका लागि ३ वटा छाड्न प्रस्ताव गरेका छन् । काठमाडौं, विराटनगर र ललितपुर लिन प्रस्ताव गरेका उनीहरुले भरतपुर माओवादीले, वीरगञ्ज जसपाले र पोखरा एकीकृत समाजवादीले लिन खोजेका छन् ।

कास्कीका ३ वटै प्रतिनिधि सभा निर्वाचन क्षेत्रका साथै ६ वटै प्रदेश सभा निर्वाचन क्षेत्रलाई पोखरा महानगरले छोएको छ । पोखराका ११÷११ वटा वडा तीन वटा प्रतिनिधि सभाको क्षेत्रमा पर्छ । ‘मेयर गुमायौं भने प्रदेश र केन्द्रको चुनावमा पनि असर गर्छ’ पूर्वमन्त्री थापाले भने, ‘यो कुरा नेताहरुले बुझ्नुप¥यो नि !’
पोखराको मेयर आफूहरुले लिएर अरु पदमा छलफल गर्न सकिने भन्दै कास्कीका कांग्रेस नेताहरुले अडान लिदैं आएका छन् । जसले गर्दा यहाँ सत्तारुढ गठबन्धनका दलहरुबीच पटक–पटक वार्ता भएपनि सहमति हुन सकिरहेको छैन । कांग्रेसका वरिष्ठ नेता रामचन्द्र पौडेल पोखरामा आएको बेलामा समेत यहाँका नेताहरुले कुनै पनि हालतमा मेयर छोड्न नसकिने बताएका थिए ।

एमालेका मेयर मानबहादुर जिसीले आफैंले सार्वजनिक गरेको घोषणापत्र अनुसारको काम गर्न नसक्नु, शुरुवात गरिएका काम र अभियान असफल हुनु, भ्रष्टाचारमा महानगरपालिका लिप्त हुनु, सयौंको संख्यामा रहेका एमाले कार्यकर्ताले राज्यको ढुकुटी दोहन गर्दा समेत महानगरपालिका मुकदर्शक हुनु लगायतका घटनाहरुले गर्दा यतिबेला पोखरामा एमालेको जनाधार कमजोर देखिएको छ ।

‘मेयर कांग्रेसले पाउनुपर्छ । अरु पदमा भने छलफल गरेर हामी लचिलो हुन तयार छौं,’ मन्त्री थापाले भने, ‘३/३ (महानगरपालिका) बाँड्ने नेताहरु बीच कुरा भएको सुनेका छौं । त्यसो हुँदा पोखरा अरुलाई दिने हो कि भन्ने शंका लागेर काठमाडौं जान लागेका छौं ।’