पोखरा, २७ चैत । सत्तारुढ गठबन्धन दलका प्रमुख दलहरुले पोखरा महानगरपालिकाको मेयर नेपाली काँग्रेसलाई र उपमेयर नेकपा माओवादी केन्द्रलाई बाँडफाँड गर्ने भएका छन् । स्रोतका अनुसार गठबन्धन दलहरु बीच केन्द्रमा नैं लगभग सहमति भईसकेको छ ।

नेपाली कांग्रेसका तर्फबाट दर्जनौं उमेद्वारहरु मेयरको आँकाक्षी देखिएका छन् । जसमा पूर्वमन्त्रीदेखि वाहलवालामन्त्री हुँदै युवा उद्यमी र महिला नेतृहरुको चर्चा भईरहेको छ । त्यसैगरी उपमेयरमा माओवादी केन्द्रका तर्फबाट पनि केही पात्रहरुको विषयमा चर्चा भईरहेको छ । केन्द्रले नै महानगरका उमेद्वारको टुङ्गो लगाउने सहमति गरेका हुनाले यो विषयमा पात्रको नाम सार्वजनिक गरिएको छैन ।

पछिल्लो समय लगभग कुन ठाउँ कुन गठबन्धनका दललाई दिने भन्ने टुङ्गो लगाउँदै गरेका दलहरुले कसलाई नेतृत्वको जिम्मा दिने भन्ने विषय भने अझैं टुङ्गयाई सकेका छैनन् । एमालेका तर्फबाट पोखरा महानगरपालिकाको मेयरका रुपमा वर्तमान उपमेयर मञ्जु गुरुङको चर्चा चलिरहेको छ भने कांग्रेसका तर्फबाट लक्ष्मी पाण्डे र सरस्वती गुरुङको नाम पनि चर्चामा छ ।

कांग्रेसका तर्फबाट पोखराको मेयरका रुपमा दुई व्यवसायीको धमासान टकराव हुने देखिन्छ । स्रोतका अनुसार गण्डकी प्रदेशका वाहलवाला कानुन, सञ्चार तथा प्रदेशसभा मामिलामन्त्री बिन्दुकुमार थापा र युवा उद्यमी किरण केसीका बिच कसलाई मेयरको टिकट दिने भन्ने विषयमा छलफल चलिरहेको एक नेताले जानकारी दिए । त्यसैगरी माओवादी केन्द्रका तर्फबाट उपमेयरमा तेजकुमारी पौडेल, वखानसिंह तमु लगायतका नेताहरुको नाम चर्चामा रहेको छ ।

त्यसैगरी, चितवनको भरतपुर महानगरपालिकामा मेयरका लागि एमालेले प्रदेश सांसद विजय सुवेदीलाई उठाउने भएको छ । महानगरको मेयरमा सुवेदीलाई सर्वसम्मत ढंगले उमेद्वार बनाउने घोषणा गरिएको देवी ज्ञवालीले जानकारी दिएका छन् ।

महानगरको मेयरमा यस अघि माओवादी केन्द्रकी रेणु दाहालसँग चुनावी मैदानमा उत्रिएका ज्ञवालीको चर्चा भएपनि उनले नै सुवेदीलाई मेयरको उमेदवारका रुपमा प्रस्तुत गरेका थिए ।

एमालेले देशव्यापी रुपमा राप्रपासँग गठबन्धन गर्ने तयारी गरिरहेको हुनाले उपमेयरका सम्बन्धमा भने अहिले केही घोषणा गरेको छैन ।