काठमाडौँ, १४ चैत । नेपाली कांग्रेसका महामन्त्री विश्वप्रकाश शर्माले एमाले विभाजनले खण्डहर भएको बताएका छन् । महामन्त्री शर्माले काठमाडौंमा आयोजित एक कार्यक्रममा बोल्दै भने-‘अहिले न तथ्यमा एमाले अघि छ, न त राजनीतिकरुपमा एमाले बलियो छ । एमाले त विभाजनले खण्डहरु भईसकेको छ ।’

‘चार वर्षअघि स्थानीय तहमा एमालेले हामीभन्दा २७ सिट बढी जितेको हो तर त्यो माधव, झलनाथ र बामदेवसहितको एमाले हो,’ उनले भने–‘अहिले ओलीमात्रैको एमाले हो ।’ एमाले पार्टी जसरी खण्डहर बनेको छ, सत्तामा बस्दा त्यसैगरि खुइलिएको पनि छ । त्यसैले हामीले एमाले बलियो भएर होइन; हामी थप बलियो बन्न गठबन्धन गर्ने हो । यो संविधान र लोकतन्त्रमाथि ओली सरकारले गरेको आक्रमणको विरुद्धमा गठबन्धन गर्ने हो ।’ प्रवक्ता शर्माको भनाई थियो ।

त्यसो त आज सोमबार बसेको कांग्रेसको केन्द्रीय कार्यसमितिमा पनि बोल्दै महामन्त्री शर्माले सभापति शेरबहादुर देउवाको बोली सच्याउन आग्रह गर्दै एमाले बलियो छ भन्ने कुरा गलत भएको दाबी गरेका छन् । ‘सभापतिज्यू, एमाले बलियो छ भनेर हजुरले भन्नुभएको कुरा सुनिएको छ; यथार्थ त्यस्तो छैन । हामी एमालेभन्दा कमजोर होइन; धेरै बलियो भएका छौँ,’ बैठकमा शर्माको भनाइलाई उद्धृत गर्दै एक केन्द्रीय सदस्यले भने, ‘हामी गठबन्धन गरौँ तर त्यो एमाले बलियो भएर होइन; हामी थप बलियो हुनका लागि गरौँ हाल तथ्यांक र राजनीतिक रुपमा समेत एमाले कांग्रेसभन्दा बलियो छैन ।’