काठमाडौं, १२ चैत । नेपाली कांग्रेसका सभापति एवं प्रधानमन्त्री शेरबहादुर देउवाले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ हार्ने चुनाव नलड्ने बताउँदै गठबन्धनका विरुद्ध धेरै नबोल्न आफ्ना नेताहरूलाई आग्रह गरेका छन् ।

काठमाडौंमा शनिबार विपी स्मृति सामुदायिक सहकारी अस्पताल लिमिटेडको १४औँ वार्षिक साधारणसभालाई सम्बोधन गर्दै प्रधानमन्त्री देउवाले भने–‘कति ठाउँमा प्रचण्डजीका मान्छे जितेका छन्, कति ठाउँमा माधव नेपालजीका मान्छे जितेका छन् । स्थानीय तहमै हाम्रो भन्दा उनीहरूका मान्छे धेरै जितेका छन्, फेरि ओलीजीसँग मिले भने त हामी कसरी जित्छौं?’

केन्द्रीय सदस्य डा. शेखर कोइरालाले कांग्रेस एक्लै चुनावमा जानुपर्नेमा जोड दिएपछि प्रधानमन्त्री देउवाले गठबन्धन गरेर जानुपर्नेमा जोड दिएका हुन् । प्रधानमन्त्री देउवाले भने–‘अहिले पनि नेकपा (एमाले) कमजोर नभएको र फेरि पनि माओवादी र एमाले मिल्ने सम्भावना यथावत रहेको छ । माओवादी र एमाले फुटे, हामी जिति हाल्छौं भन्ने सोचिराख्नु भएको होला । फेरि मिलिदियो भने नि के हुन्छ ?’

माओवादी अध्यक्ष दाहाल हार्ने चुनाव लड्ने मान्छे नभएको प्रधानमन्त्री देउवाको भनाइ थियो । ‘ओली र प्रचण्ड फुटिहाले, हामी जितिहाल्छौं भन्ने आसै नगरे हुन्छ,’ उनले भने, “प्रचण्ड हार्ने चुनाव लड्छन् ? जहाँ सजिलो हुन्छ, उतै मिलिदिन्छन् । त्यो पनि बुझ्नुस्, हामीले लेखेट्यो भने कहाँ जान्छन् ?’

आफूले नैतिक रुपमा पनि माओवादी, नेकपा (एकीकृत समाजवादी) र जनता समाजवादी पार्टी (जसपा)लाई गठबन्धन छोडेर जाऊ भन्न पनि नमिल्ने प्रधानमन्त्री देउवाको भनाई थियो । ‘अदालतले संसद् विघटन खारेजपछि सबैले सहयोग गरेर प्रधानमन्त्री बनिहाले । त्यहि मेरो गल्ती थियो भने भन्नुस्’, उनले प्रश्न गरे, “प्रधानमन्त्री बनाउने साथीहरूलाई ‘गेट आउट’ भन्ने मैले? त्यो कुरा भन्न मिल्छ मैले ?’