काठमाडौं, ११ चैत । नेकपा (एकीकृत समाजवादी)का अध्यक्ष माधवकुमार नेपालले २०५१ सालमा अघि सारिएका वृद्धाभत्ता र आफ्नो गाउँ आफैं बनाऊँ लगायतका लोकप्रिय कार्यक्रममा नेकपा एमालेका अध्यक्ष केपी शर्मा ओलीको कुनै भूमिका नभएको बताएका छन् ।

काठमाडौंमा शुक्रबार बृहत् महिला भेलालाई सम्बोधन गर्दै अध्यक्ष नेपालले त्यति वेलाका सामाजिक सुरक्षाका कार्यक्रम आफूहरूले ल्याएको दावी गर्दै भने–‘२०५१ सालको सरकारमा वृद्धवृद्धालाई भत्ताको व्यवस्था मनमोहन अधिकारी, भरतमोहन अधिकारी र मैले गरेका हौं, केपी ओलीको कुनै भूमिका नैं थिएन ।’

‘आफ्नो गाउँ, आफैं बनाऔंको शुरूआत हामीले गरेका हौं। एकल महिला र अपाङ्गता भएका व्यक्तिलाई भत्ता दिने व्यवस्था हामीले गरेका हौं,’ अध्यक्ष नेपालले भने, ‘केपी ओलीलाई थाहा दिएको भए हुँदैन, भत्ता दिनु पर्दैन भन्थे ।’

एमाले अध्यक्ष ओलीले आगामी स्थानीय चुनावमा एमाले नेतृत्वको सरकारले ल्याएका लोकप्रिय कार्यक्रमलाई अघि सारेर जनतामा जान निर्देशन दिएपछि यता अध्यक्ष नेपालले कडा जवाफ दिएका हुन् ।

तत्कालिन अवस्थामा मनमोहन अधिकारी नेतृत्वको सरकारमा नेपाल उपप्रधान तथा परराष्ट्र मन्त्री थिए भने ओली गृह मन्त्री थिए । त्यति वेलाका लोकप्रिय अन्य कार्यक्रममा पनि ओलीको भूमिका नभएको नेपालको भनाइ थियो ।

त्यति वेला नैं आफूहरुले समाजवादको झल्को दिने कार्यक्रम अघि सारेको दावी गर्दै नेता नेपालले राजनीतिक रूपमा पनि कम्युनिष्ट आन्दोलनको विरासत आफ्नो पार्टीसँग रहेको दाबी गरे ।