पोखरा, १० चैत । माओवादी केन्द्र गण्डकी प्रदेश कमिटीको अध्यक्ष चुनिएको ४ महिनापछि मात्र बल्ल पदाधिकारीको टुङ्गो लागेको छ । गुटगत राजनीतिले आक्रान्त माओवादी केन्द्रमा पोखरा महानगर कमिटीको अझै लफडा कायमै छ ।

अध्यक्ष पुष्पकमल दाहाल ‘प्रचण्ड’ले दिग्दारी र आक्रोश पोखेपछि माओवादीले हिजो बुधबार राति निर्वाचनमार्फत गण्डकी कमिटीको पदाधिकारी टुंगो लगाएको हो । ८ पदाधिकारीका लागि १८ जनाको उम्मेदवारी परेपछि मतदान भएको थियो ।

मतदान पश्चात् उपाध्यक्षमा गुणाखर बस्याल (पर्वत), मित्रशरण शर्मा (नवलपुर), ज्ञामनाथ गैह्रे (बाग्लुङ) निर्वाचित भए । सचिवमा जगन्नाथ खनाल (गोरखा) र सहसचिवमा अतिन्द्रकेशरी न्यौपाने (तनहुँ),मेख बहादुर भण्डारी (लम्जुङ), टेकबहादुर बिक (म्याग्दी) निर्वाचित भएका छन् । त्यसैगरी कोषाध्यक्षमा तारा भुषाल (स्याङजा) निर्वाचित भएका छन् ।

गण्डकी प्रदेशमा माओवादी कार्यकर्तामा देखिएको गुटबन्दी, अराजकता र खुट्टा तानातानको स्थितिलाई देखेर अध्यक्ष प्रचण्डले चिन्ता जाहेर गरेपछि बल्ल गण्डकी कमिटीको पदाधिकारीको टुङ्गो लागेको हो । नजिकिदैं गरेको चुनावलाई मध्यनजर गर्दै आइतबार प्रदेशस्तरीय कार्यकर्ता प्रशिक्षण भेलामा आएका अध्यक्ष प्रचण्डले भनेका थिए–‘गुटबन्दी, अराजकता, तछाडमछाडले गण्डकी प्रदेशले खडा गरेका कृतिमानहरु विघटित, विस्थापित र आतंकजस्तो बन्न पुगेको देख्दा ठूलो चिन्ता लागेको छ । अरु प्रदेशमा ऊर्जाका साथ प्रशिक्षण गरेको, तर गण्डकी प्रदेशमा आउँदा चिन्ता, गम्भीरता महसुस भएको छ ।’

‘यहाँ पार्टीभित्र भएको झमेला, गुटबन्दी, खुट्टा तानातान, मारामार छ,’ अध्यक्ष प्रचण्डको आक्रोश थियो, ‘पोखरा महानगरपालिकामा त एउटा गुटले अर्को गुटलाई हराउन के–के गर्न सकिन्छ सबै गर्न थाल्नु भएछ ।’ स्थानीय तहको चुनावमा आक्रामक ढंगले पार्टीलाई लैजानुपर्नेमा नेताहरु आफ्नै पार्टीभित्र गुटगत दलदलमा फसेकोमा प्रचण्डले दिग्दारी पोखेका थिए ।