काठमाडौं, ९ चैत । नियमित सरुवा निकाल्नु पर्ने बेलामा नजिकिदैं गरेको चुनावलाई मध्यनजर गर्दै शक्ति केन्द्रका रोजाइका व्यक्तिहरुलाई पठाउन प्रहरी प्रधान कार्यालयले प्रहरी नायव उपरीक्षक (डीएसपी)हरुको आज काज सरुवा गरेको छ ।

विशेष परिस्थितिमा अधिकृतहरुलाई खटाउने गरी प्रहरी नियमावली, २०७१ ले काज सरुवाको व्यवस्था गरेको भएपनि शक्तिकेन्दको रोजाईमा परेका २५ डीएसपीको काज सरुवा गरिएको छ भने १० जिल्लाका प्रहरी प्रमुख फेरिएका छन् ।

प्रहरी नियमावली, २०७१ को नियम ५२ ले काज सरुवाको व्यवस्था गरेको भएपनि नियमावलीको नियम ५२ (१०) मा सामान्यतया प्रहरी अधिकृतलाई काजमा नखटाइने भनेर उल्लेख गरिएको छ । तर पहुँचमार्फत पोष्टिङ लिनका लागि काज सरुवाको दुरुपयोग हुँदै आईरहेको छ ।