काठमाडौँ, १७ फागुन । एमसीसी अनुमोदनको क्रममा पार्टीमा विवाद बढेपछि नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ अर्का नेता नारायणकाजी श्रेष्ठ बीच आज भेटवार्ता भएको छ ।

एमसीसी सम्झौतासँग संसद्बाट पारित गर्ने पार्टी निर्णयप्रति असहमति जनाउँदै आएका नेता श्रेष्ठलाई भेट्न अध्यक्ष प्रचण्ड आज मंगलबार दिउँसो श्रेष्ठ निवास ललितपुरको हात्तीवन पुगेका थिए । यतिबेला अध्यक्ष पुष्पकमल दाहाल र नेता नारायणकाजी श्रेष्ठबीच भेटवार्ता जारी रहेको स्रोतको भनाई छ ।

दाहालले एमसीसी सम्बन्धमा प्रस्टिकरणका लागि सोमबार आयोजित पत्रकार सम्मेलनमा श्रेष्ठलाई लक्षित गर्दै पार्टी छाड्ने मन भए नरोक्ने मनसायको अभिव्यक्ति सार्वजनिक गरेका थिए । पार्टीमा दाहालले एकलौटी गर्न थालेको भन्दै श्रेष्ठ पक्षधरले विरोध जनाइरहेका अवस्थामा श्रेष्ठ पक्षधरलाई पार्टी छोड्नसमेत संस्थापन पक्षले दबाब दिएपछि विवाद झनै चर्किएको हो ।