पोखरा । लकडाउनका कारण पोखरा औद्योगिक क्षेत्रमा रहेका २७ उद्योगहरु बन्द नै भएका छन् । ७६ वटा उद्योगहरु सञ्चालनमा रहेकोमा लकडाउनका कारण हाल २७ वटा उद्योगहरु बन्द रहेको औद्योगिक क्षेत्र व्यवस्थापन लिमिटेडका प्रवन्धक भूषणकुमार उपाध्यायले जानकारी दिए ।
प्रबन्धक उपाध्यायका अनुसार सरकारले बन्दाबन्दीको समयमा उद्योग कलकारखानालाई वर्गीकरण गरेर खोल्ने अनुमति दिएपछि ५० वटा उद्योगहरु ४० प्रतिशत रुपमा मात्र सञ्चालन भईरहेका छन् । डेरी, खानेपानी, चाऊचाऊ, विस्कुट र अक्सिजन प्लान्ट लगायतका उद्योगहरु भने निरन्तर चलिरहेका छन् । बाँकी २७ उद्योगहरु लकडाउन पछि सञ्चालनमा आउने प्रबन्धक उपाध्यायले जानकारी दिए ।
निजी क्षेत्रबाट ४ अर्ब भन्दा बढि लगानी रहेको पोखरा औद्योगिक क्षेत्रमा ३ हजार भन्दा बढि मजदुरहरुले प्रत्यक्ष रोजगारी पाएका छन् । प्रदेश कैं औद्योगिक हबको रुपमा रहेको यो क्षेत्र चारसय ७२ रोपनीमा फैलिएको छ । लकडाउनको समयमा त्यहाँ रहेका दुईवटा अक्सिजन प्लान्टहरु भने २४ सैं घण्टा चलिरहेका छन् । कोरोना महामारीको समयमा गण्डकी प्रदेशमा रहेका सम्पूर्ण सरकारी तथा निजी अस्पतालहरुमा यहीँ दुई कम्पनीहरुले अक्सिजन आपूर्ति गर्दै आईरहेका छन् ।
यस क्षेत्रमा ८६ वटा उद्योग तथा सहयोगी संघ संस्थाहरु रहेको छन् । जसमध्ये सञ्चालनमा रहेका ७६ वटा उद्योगहरुले राज्यलाई वार्षिक करिब ५० करोडको राजश्वमा बुझाउँदै आईरहेका प्रबन्धक उपाध्यायले बताए ।