पोखरा । अविश्वासको प्रस्तावमाथि मतदान हुनुभन्दा एक दिन अगाडि गण्डकी प्रदेशका मुख्यमन्त्री पृथ्वीसुब्बा गुरुङले आज पदबाट राजीनामा दिएका छन् । प्रदेशमा स्थिरता नचाहने, विकास विरोधी तत्वहरुको अराजनीतिक चलखेलको कारण काम गर्ने वातावरण नभएको भन्दै प्रदेश प्रमुख सीताकुमारी पौडेललाई दिएको राजीनामा पत्रमा उल्लेख गरेका छन् ।

‘एउटै घोषणापत्र मार्फत् निर्वाचनमा गएका दलहरुबाट समेत असहयोग र अस्थिरताको वातावरण सृजना भएका कारण मुख्यमन्त्रीको हैसियतले काम गर्ने वातावरण भएन,’ मुख्यमन्त्री गुरुङले राजीनामा पत्रमा लेखेका छन्–‘नेपालको संविधान २०७२ को धारा १६९ को उपधारा १ (क) बमोजिम माननीय प्रदेश प्रमुख समक्ष आजैका मितिदेखि लागू हुने गरी आफ्नो पदबाट राजीनामा दिएको छु ।’

राजीनामा पत्रमा मुख्यमन्त्री गुरुङले गण्डकी प्रदेश सभाका वामपन्थी दलहरुको समर्थन र सहयोगमा प्रदेश सरकार गठन गरी ‘समृद्ध प्रदेश र सुखी नागरिक’को मूल लक्ष्यका साथ सरकारले प्रतिपक्षी दलहरु समेतलाई विश्वासमा लिई सरकार सञ्चालन गर्ने संस्कारको विकास गर्दै तीन वर्षको छोटो अवधिमा प्रदेशका नागरिकले अनुभूति गर्ने गरी समृद्ध प्रदेश निर्माणको बलियो आधारशिला निर्माण गरेको उल्लेख छ ।