पोखरा । राष्ट्रिय माध्यमिक विद्यालय पोखरा–१, टुँडिखेलका प्रधानाध्यापकसहित पक्राउ परेका तीनजना शिक्षकलाई कास्की जिल्ला अदालतले अनुसन्धानका लागि पाँच दिनको म्याद थप गरेको छ । राष्ट्रिय परीक्षा बोर्ड सानोठिमी, भक्तपुरको जाहेरीका आधारमा कास्की प्रहरीले पक्राउ गरेको हो ।

शिक्षा ऐन अन्तरगत मुद्दामा पक्राउ परेका उनीहरुलाई एक छात्रालाई कक्षा ११ को ऐच्छिक अंग्रेजी र शैक्षणिक विधि विषयक आंशिक परीक्षामा परीक्षा केन्द्रभन्दा बाहिर होटलमा लगि अमर्यादित रुपमा परीक्षा लिएको र अन्य प्रचलित कानुन विपरितको कसुर गरेको आरोपमा गत माघ २ गते बोर्डले जाहेरी दिएको जिल्ला प्रहरी कार्यालय कास्कीका प्रमुख एसपी जीवन श्रेष्ठले जानकारी दिनुभयो ।

पोखरा महानगरपालिका वडा नं. १८, कास्कीकोट स्थायी घर भई हाल पोखरा वडा नं. १ बाघबजार बस्ने राष्ट्रिय माविका प्रधानाध्यापक वर्ष ४८ का सुर्य तिवारी, कास्की रुपा गाउँपालिका वडा नं. ४ सिद्ध स्थायी घर भई हाल पोखरा–११ फुलबारी बस्ने राष्ट्रिय माविसका शिक्षक ४१ वर्षीय घनश्याम रेग्मी र पोखरा–२० भलाम बस्ने राष्ट्रिय माविका शिक्षक शिरिष कुमार वस्ताकोटीलाई कास्की प्रहरीले पक्राउ गरी थप अनुसन्धान शुरु गरेको जिल्ला प्रहरी कार्यालय कास्कीका प्रवक्ता एवम् डिएसपी सुवास हमालले जानकारी दिनुभयो ।