काठमाडौं । सत्तारुढ दलमा देखिएको किचलो आखिर संसद विघटनको ढोकामा पुगेको छ । प्रधानमन्त्री खड्गप्रसाद ओलीले संसद विघटनको सिफारिस लिएर आज राष्ट्रपतिको कार्यालयमा पुगेका छन् । सरकारले सिफारिस गरेअनुसार राष्ट्रपटिले विघटन गरेमा प्रतिनिधिसभा भंग हुनेछ । प्रधानमन्त्री ओलीले संविधानमै व्यवस्था नभएको स्वेच्छाचारी अधिकार प्रयोग गरेर संसद विघटन गरेका छन् । प्रधानमन्त्रीको यो कदमको पार्टीभित्र र बाहिरबाट चौतर्फी विरोध सुरु भएको छ ।

आज विहान बसेको मन्त्रिपरिषद्को आकस्मिक बैठकले संसद् विघटनको सिफारिस गर्ने निर्णय गरेको थियो । सोही निर्णय अनुसार प्रधानमन्त्री ओलीले सिफारिस लिएर राष्ट्रपति विद्यादेवी भण्डारी समक्ष पुगेका हुन् ।

स्थायी सरकार र समृद्धिको नारा लिएर ५ वर्षे कार्यकालको लागि स्पष्ट बहुमत पाएको सरकार आफ्नै किचलो र स्वार्थमा रुमल्लिएर विघटनको संघारमा पुगेको छ । कोरोना संक्रमणको भयावह अवस्थामा मुलुक गुज्रिरहेको अवस्थामा जनता र देशका लागि जुट्नु पर्ने बेलामा सत्तारुढ दल भने आफैं भित्रको किचलो व्यवस्थापन गर्न नसकेर इतिहास कैं सबैभन्दा कमजोर, भ्रष्ट र बदनाम हुन पुगेको छ ।