पोखरा । नेपाल प्रहरीका एक ईन्सपेक्टर श्रीमतीलाई विचल्लीमा पारेर वेखबर भएपछि उनकी श्रीमती न्याय खोज्दै प्रहरीको शरणमा पुगेकी छिन् । प्रहरी निरीक्षक ध्रुबप्रसाद शर्माकी श्रीमती स्मृतिले खोजतलास तथा कारवाही गरी पाउँ भनी श्रीमान् कैं विरुद्धमा प्रहरी तथा प्रशासनमा उजुरी दिएकी हुन् ।

जिल्ला प्रहरी कार्यालय म्याग्दीमा कार्यरत प्रहरी निरीक्षक शर्माको वडा प्रहरी कार्यालय पोखरा–६ बैदाममा सरुवा भएको थियो । जिल्ला प्रहरी कार्यालय म्याग्दीका प्रहरी प्रमुख डिएसपी किरणजंग कुँवरले त्यहाँबाट रवाना लिएर बैदाम दरबन्दी भएका ईन्सपेक्टर शर्मा विदाई भईसकेर गएको जानकारी दिए । यता वडा प्रहरी कार्यालय बैदाममा बुझ्दा समेत ईन्सपेक्टर ध्रुब अझै त्यहाँ पनि आईपुगेका छैनन् ।

डिएसपी कुँवरले भने–‘४/५ दिन भयो, यहाँबाट विदा भएर गएको । तर उनको परिवारका तर्फबाट खोजतलास तथा कारवाहीका लागि उजुरी परेको छ । त्यस विषयमा आज हामी छलफल गर्दैछौं । विदामा भएकोले अहिले ध्रुबसँग सम्पर्क हुन सकेको छैन ।’

प्रहरी निरीक्षक शर्माकी श्रीमती स्मृतिले आफूलाई विचल्लीमा पारेर वेखबर भएकोले खोजतलास तथा कारवाहीका लागि जिल्ला प्रशासन कार्यालय म्याग्दी र जिल्ला प्रहरी कार्यालय म्याग्दीमा उजुरी दर्ता गरेको जानकारी दिईन् । स्मृतिले भनिन्–‘विवाह भएको आठ महिना भयो । घरमा पनि लैजानु भएको छैन । पेटमा भएको बच्चा पनि जबरजस्ती फाल्न लगाउनु भयो । अहिले विना खबर वेपत्ता भएर मलाई विचल्लीमा पारेर भाग्नु भएको छ ।’

म्याग्दी नै माईत भएकी स्मृतिसँग प्रेम सम्बन्धमा रहेका ईन्सपेक्टर ध्रुबले पोखरामा अर्कै युवतीसँग विहेको तयारी गरेका थिए । टिकाटालो भईसकेको अवस्थामा स्मृतिले आफ्नो पेटमा भएको बच्चासहित प्रहरीकोमा पुगेर उजुरी गरेपछि पोखरामा हुन लागेको विवाह टुटेको थियो । पछि ईन्सपेक्टर ध्रुबले स्मृतिसँग जेठ १० गते मन्दिरमा विवाह गरेका थिए ।

स्मृतिले भनिन्–‘मलाई गर्भवती अवस्थामा पु¥याएर उहाँले पोखरामा विवाह गर्न टिकाटालो नै गरिसक्नु भएको रहेछ । त्यो थाहा पाएर मैले उजुरी गरेपछि विवाह त रोकियो । तर मलाई उहाँले पटक–पटक यातना दिने र विचल्लीमा पारेर भाग्ने काम गर्नुभएको छ ।’ ‘मलाई सम्बन्ध विच्छेद गर्ने बारम्बार धम्की दिनुहुन्छ । चरम यातना दिए पछि यसले आफैं मलाई छाडेर जान्छे भनेर पटक–पटक यस्ता हर्कतहरु प्नि गर्नुभो । म उहाँ नै भनेर सहेर, सहमती गरेर बसे । तर आज एक्कासी उहाँले मलाई छोडेर बेखबर भई हिड्नुभयो । त्यसैले म उहाँको खोजी गर्दैछु ।’ स्मृतिले भनिन् ।

त्यसो त ईन्सपेक्टर ध्रुबले पोखरामा गर्न लागेको विवाह टुटेपछि वैशाख ११ गते स्मृतिसँग विवाह दर्ता गरेका थिए । विवाह दर्ता गरेको लगभग १ महिनापछि जेठ १० गते स्मृतिका दिदीभिनाजुसहितको उपस्थितिमा गलेश्वर मन्दिरमा पुगेर स्मृतिको सिउँदोमा सिन्दुर राखेका थिए । श्रीमती स्मृतिका अनुसार ध्रुबले विवाह गरेपछि लगातार २ दिनसम्म मानसिक र शारीरिक यातना दिएर पेटमा भएको बच्चा फाल्न बाध्य बनाएका हुन् ।

सुरक्षाकर्मीबाट नै असुरक्षित र विचल्लीमा परेपछि स्मृतिले मंसिर ९ गते नै जिल्ला प्रहरी कार्यालय म्याग्दी र जिल्ला प्रशासन कार्यालय म्याग्दीमा खोजतलास तथा कारवाहीका लागि उजुरी दिन बाध्य भईन् । स्मृतिले दिएको उजुरीमा गाँस, बाँस र कपाससहितको सुरक्षा व्यवस्था मिलाउन र कारवाही गर्न माग गरेकी छिन् । स्मृतिले भनिन्–‘मलाई उहाँको बदनाम गर्न मन थिएन । तर मलाई पटक–पटक विचल्ली र वेखर्ची बनाएर यसरी सम्पर्कविहिन भएर भागेपछि म सञ्चारमाध्यममा आउन बाध्य भए ।’

प्रहरी निरीक्षकको  जिम्मेवारी सम्हालेका व्यक्तिबाट नै यस्ता घटना हुनुले नेपाल प्रहरी संगठन र बर्दी कै बदनाम भएको छ । यस घटनालाई प्रहरी संगठनले पनि गम्भिरताका साथ हेर्नु पर्ने र यस्ता विकृति र प्रवृत्ति रोक्न ठोस कदम र कार्वाही गर्नुपर्ने देखिन्छ ।