पोखरा, ८ असार । घरभित्र पसी दराज तोडफोड गरी चोरी गर्ने दुईजना प्रतिवादीलाई प्रहरीले पक्राउ गरेको छ। पोखरा महानगरपालिका–१५, मेरिगोल्डस्थित एक घरमा चोरी भएको घटनाको अनुसन्धानपछि प्रहरीले उनीहरूलाई काठमाडौंबाट नियन्त्रणमा लिएको हो।

गत जेठ २४ गते दिउँसोको समयमा मनिसा थापाको घरमा बालिका मात्रै रहेको मौका छोपी चोरी भएको थियो। आफूलाई ’झ्याल–ढोका नाप्न आएको’ भनी परिचय दिँदै घरभित्र प्रवेश गरेका व्यक्तिले दराज तोडफोड गरी सुनका गरगहना र नगद १३ हजार रुपैयाँ चोरी गरेर फरार भएका थिए।

घटनाको सूचना प्राप्त हुनासाथ जिल्ला प्रहरी कार्यालय कास्की र वडा प्रहरी कार्यालय रामबजारबाट खटिएको संयुक्त प्रहरी टोलीले प्राविधिक अनुसन्धानलाई तीव्र पारेको थियो। अनुसन्धानका क्रममा सर्लाहीको लालबन्दी नगरपालिका–१७ स्थायी घर भई हाल काठमाडौंको कागेश्वरी मनहरा–९, शिवनगर बस्ने ३५ वर्षीय भुवनबहादुर साह शंकरको संलग्नता देखिएपछि असार ४ गते प्रहरीले उनलाई काठमाडौंको काँडाघारीबाट पक्राउ गरेको हो।

पक्राउ परेका साहमाथि गरिएको प्रारम्भिक अनुसन्धानबाट उनले चोरी गरेका सुनका बालाहरू करिब साढे ६ लाख रुपैयाँ मूल्य बराबरमा सिन्धुपाल्चोकको जुगल गाउँपालिका–२ घर भई हाल काठमाडौंको मुलपानी बस्ने ३५ वर्षीय बिराज सुनारलाई बिक्री गरेको खुलेको थियो। सोही आधारमा प्रहरीले सुनारलाई पनि पक्राउ गरेको छ।

जिल्ला प्रहरी कार्यालय कास्कीका प्रमुख एसपी नविन कार्कीका अनुसार, पक्राउ परेका दुवैजनाविरुद्ध सम्मानित कास्की जिल्ला अदालतबाट ६ दिनको म्याद थप गरी चोरी तथा डाँकासम्बन्धी कसूरमा थप अनुसन्धान प्रक्रिया अगाडि बढाइएको छ।

प्रहरीले अभियुक्तहरूको साथबाट सुनका विभिन्न गरगहनाहरू (तिलहरी, चन्द्रमा, झुम्का, औंठी र मुन्द्रा), चाँदीका गरगहना (बाला, सिक्का र सिक्री), नगद ८१ हजार ५ सय रुपैयाँ तथा वारदातको समयमा प्रयोग गरिएको ज्याकेट र पाइन्ट समेत बरामद गरेको छ।