पोखरा, ६ असार । कास्की प्रहरीले पोखराबाट लागूऔषधको ठूलो कारोबार भइरहेको अवस्थामा एकजना वृद्धलाई पक्राउ गरेको छ।

जिल्ला प्रहरी कार्यालय कास्की र लागूऔषध नियन्त्रण ब्युरो शाखा कार्यालय पोखराबाट खटिएको संयुक्त प्रहरी टोलीले विशेष सूचनाका आधारमा पोखरा महानगरपालिका वडा नं. १३, कुडहर क्षेत्रमा छापा मारेको थियो। उक्त कारबाहीका क्रममा नवलपरासी (बर्दघाट सुस्ता पूर्व)को मध्यबिन्दु नगरपालिका-१० घर भई हाल पोखरा–१३, कुडहरमा बस्दै आएका ७३ वर्षीय अमर हमाल पक्राउ परेका हुन्।

प्रहरीले हमालको साथबाट ठूलो परिमाणमा लागूऔषध बरामद गरेको छ। प्रहरीका अनुसार उनको साथबाट डाईजेपाम २४३ एम्पुल, फेनारगन २३८ एम्पुल र ब्रुफिनुर्फिन २३४ एम्पुल गरी जम्मा ७१५ एम्पुल लागूऔषध फेला परेको हो।

पक्राउ परेका हमाललाई जिल्ला प्रहरी कार्यालय कास्कीले नियन्त्रणमा लिएर आवश्यक अनुसन्धान प्रक्रिया अगाडि बढाएको छ। जिल्ला प्रहरी कार्यालय कास्कीका सूचना अधिकारी तथा प्रहरी नायव उपरीक्षक (डीएसपी) वीरेन्द्रकुमार पासवानका अनुसार हमालविरुद्ध लागूऔषध सम्बन्धी कसूरमा मुद्दा दर्ता गरी सम्मानित कास्की जिल्ला अदालतबाट सात दिनको म्याद थप गरेर थप अनुसन्धान भइरहेको छ।

समाजमा लागूऔषधको दुर्व्यसनी र कारोबारलाई नियन्त्रण गर्न प्रहरीले सक्रियता बढाएसँगै पछिल्लो समय यस्ता गतिविधिमा संलग्न व्यक्तिहरू धमाधम पक्राउ परिरहेका छन्।