पोखरा, ४ असार । पोखरामा लेनदेनको विषयलाई लिएर एक व्यक्तिले आफ्नै सासुमाथि चक्कु प्रहार गरेका छन् । पोखरा महानगरपालिका-१७, राममन्दिर नजिकै सोही स्थानमा बस्दै आएकी ४७ वर्षीया मुना तिवारीमाथि चक्कु प्रहार भएको हो ।

प्रहरीका अनुसार, घटना असार ३ गते बुधबार दिउँसो ४ बजेर ११ मिनेट जाँदा भएको थियो । लेनदेनको विषयमा विवाद बढ्दै जाँदा लमजुङको मध्यनेपाल नगरपालिका–२ घर भई हाल पोखरा–१७ बिरौटामा बस्दै आएका ४३ वर्षीय ध्रुवराज अधिकारीले सासु तिवारीमाथि चक्कु प्रहार गरेका हुन् ।

घटनाको सूचना प्राप्त हुनासाथ वडा प्रहरी कार्यालय बैदामबाट खटिएको प्रहरी टोलीले तत्काल घाइते तिवारीलाई उद्धार गरी उपचारका लागि सुरुमा नोबेल अस्पताल पु¥याएको थियो । उनको पेट, ढाड र छातीमा गम्भीर चोट लागेको छ । हाल उनको थप उपचार मणिपाल शिक्षण अस्पतालमा भइरहेको छ र उनको स्वास्थ्य अवस्था मध्यम रहेको प्रहरीले जनाएको छ ।

घटनामा संलग्न ध्रुवराज अधिकारीलाई प्रहरीले नियन्त्रणमा लिएको छ । घटनामा प्रयोग भएको चक्कुसहित पक्राउ परेका अधिकारीविरुद्ध जिल्ला प्रहरी कार्यालय कास्कीले कास्की जिल्ला अदालतबाट ‘ज्यान मार्ने उद्योग’ सम्बन्धी कसुरमा पाँच दिनको म्याद थप गरी आवश्यक अनुसन्धान प्रक्रिया अघि बढाएको छ । जिल्ला प्रहरी कार्यालय कास्कीका सूचना अधिकारी तथा प्रहरी नायव उपरीक्षक वीरेन्द्र कुमार पासवानले घटनाको पुष्टि गर्दै थप अनुसन्धान भइरहेको जानकारी दिएका छन् ।