स्याङ्जा, २७ जेठ । स्याङ्जामा टिपर दुर्घटना हुँदा एक जनाको मृत्यु भएको छ भने एक जना घाइते भएका छन्। म्याग्दीबाट सडक निर्माणको काममा खटिएका मजदुर बोकेको टिपर दुर्घटनामा परेपछि उनीहरू हताहत भएका हुन्।

जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक रमेशदत्त अवस्थीका अनुसार बुधबार साँझ करिब ६ः०० बजेको समयमा स्याङ्जाको चापाकोट नगरपालिका-४, पुम्दीस्थित मल्याङ्कोट–घर्लिचौर सडक खण्डमा उक्त दुर्घटना भएको हो। सडक निर्माणका लागि बालुवा बोकेर उकालो चढ्दै गरेको ग १ क ४४४६ नम्बरको टिपर बाटो चिप्लो भई अनियन्त्रित हुँदा सडकबाट करिब १०० मिटर तल खसेको सूचना अधिकारी अवस्थीले जानकारी दिएका छन् ।

दुर्घटनामा परी गम्भीर घाइते भएका म्याग्दीको मालिका गाउँपालिका–५ बस्ने २३ वर्षीय तिलक परियारलाई उपचारका लागि वालिङस्थित गह्रौँ प्राथमिक स्वास्थ्य केन्द्र लगिएको थियो। अस्पताल पु¥याइएलगत्तै चिकित्सकले उनलाई साँझ ७ः०५ बजे मृत घोषित गरेका थिए। सोही दुर्घटनामा परी १८ वर्षीय करन परियार घाइते भएका छन्। उनको हात र खुट्टामा चोट लागेको र हाल स्वास्थ्य केन्द्रमै उपचार भइरहेको छ। उनको अवस्था सामान्य रहेको प्रहरीले जनाएको छ।

दुर्घटनापछि टिपर चालक घटनास्थलबाटै फरार भएका छन्। प्रहरीले फरार चालकको खोजीकार्य तीव्र पारेको र घटना सम्बन्धमा थप अनुसन्धान भइरहेको जनाएको छ।