पोखरा, २९ वैशाख । कास्की प्रहरीले पोखराका विभिन्न स्थानमा सञ्चालन गरेको ‘स्वीप अप्रेसन’का क्रममा २३ जनालाई नियन्त्रणमा लिएको छ। जिल्ला प्रहरी कार्यालय कास्की र वडा प्रहरी कार्यालय बगरबाट खटिएको संयुक्त टोलीले वैशाख २८ गते साँझ ६ बजेदेखि राति १० बजेसम्म सञ्चालन गरेको विशेष सुरक्षा अभियानका क्रममा उनीहरूलाई पक्राउ गरिएको हो।

विशेष गरी मादक पदार्थ तथा लागू पदार्थ सेवन गरी हो–हल्ला गर्ने, झै–झगडा गर्ने, जुवातास खेल्ने र शान्ति सुरक्षामा खलल पुर्‍याउने गतिविधि बढी हुने स्थानहरूलाई लक्षित गरी प्रहरीले यो अप्रेसन चलाएको थियो। प्रहरीका अनुसार पोखरा महानगरपालिकाका विभिन्न वडाबाट यी व्यक्तिहरू समातिएका हुन्। पोखरा–१ बगर, टुँडिखेल, वडा नं. २ बाग्लुङ बसपार्क, वडा नं. ३ नदिपुर र वडा नं. ४ तेर्सापट्टी क्षेत्रबाट ७ जना पक्राउ परेका छन्। त्यसैगरी, वडा नं. ५ को पस्र्याङ र हरिचोकबाट ५ जना तथा वडा नं. १६ बाटुलेचौर, वडा नं. १८ सराङकोट र वडा नं. १९ लामाचौर क्षेत्रबाट ११ जनालाई नियन्त्रणमा लिइएको छ।

पक्राउ परेकाहरूमध्ये जुवाजन्य ‘तिन गोट्टी’ खेलाउने ३ जना विरुद्ध सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूर अन्तर्गत म्याद थप गरी अनुसन्धान अघि बढाइएको छ। यस्तै, मादक पदार्थ र लागू औषध सेवन गरी अभद्र व्यवहार गर्ने ७ जनालाई १० दिनको म्याद थप गरी हिरासतमा राखिएको छ।

जिल्ला प्रहरी कार्यालय कास्कीका सूचना अधिकारी एवं प्रहरी नायव उपरीक्षक (डीएसपी) हरीबहादुर बस्नेतका अनुसार, सामान्य मादक पदार्थ सेवन गरी हिँड्ने अन्य ७ जनालाई जिल्ला प्रशासन कार्यालय कास्कीबाट जनही एक हजार रुपैयाँ जरिवाना तिराएर छाडिएको छ। बाँकी ६ जनालाई भने आवश्यक सोधपुछ पश्चात् आफन्तको जिम्मा लगाई तारेखमा छाडिएको प्रहरीले जनाएको छ। नगरको शान्ति सुरक्षालाई मजबुत बनाउन प्रहरीले यस्ता अप्रेसनलाई निरन्तरता दिने बताएको छ।