पोखरा, २७ वैशाख । पोखराको बागलुङ बसपार्कमा केही दिनअघि भएको सामूहिक झै–झगडा (ग्याङ फाइट) मा संलग्न ६ जनालाई प्रहरीले पक्राउ गरेको छ। वैशाख २२ गते राति भएको उक्त घटनाको भिडियो सामाजिक सञ्जालमा भाइरल भएपछि सक्रिय भएको प्रहरी टोलीले एक युवतीसहित ६ जनालाई नियन्त्रणमा लिन सफल भएको हो।

जिल्ला प्रहरी कार्यालय कास्की र वडा प्रहरी कार्यालय बगरको संयुक्त टोलीले प्राविधिक अनुसन्धान र खोजतलासका क्रममा वैशाख २६ गते पोखराका विभिन्न स्थानबाट उनीहरूलाई समातेको हो। पक्राउ पर्नेहरूमा पोखरा–१३ बाझपाटन बस्ने २७ वर्षीय सुजन आले मगर, २३ वर्षीय राजेश परियार र गोरखा घर भई सोही ठाउँ बस्ने ३० वर्षीय दिलेराम गुरुङ (दिपेश) रहेका छन्।

त्यसैगरी, बागलुङ बसपार्क क्षेत्रबाटै १८ वर्षीय सुजन तामाङ, २५ वर्षीय राजकुमार तामाङ र २० वर्षीया लिजा पुनलाई पनि प्रहरीले नियन्त्रणमा लिएको छ। सार्वजनिक भएको भिडियोमा उनीहरू एकापसमा निकै उग्र रूपमा झडपमा उत्रिएको देखिएको थियो, जसले स्थानीयवासीमा त्रास पैदा गरेको थियो।
प्रहरीको प्रारम्भिक अनुसन्धानले यो झै–झगडाको मुख्य कारण लागुऔषध कारोबार रहेको खुलाएको छ। लागुऔषधको लेनदेन र क्षेत्र विस्तारको विषयलाई लिएर दुई समूहबिच विवाद हुँदा ग्याङ फाइटको स्थिति बनेको प्रहरीको निष्कर्ष छ।

जिल्ला प्रहरी कार्यालय कास्कीका सूचना अधिकारी प्रहरी नायव उपरीक्षक (डिएसपी) हरी बहादुर वस्नेतका अनुसार पक्राउ परेका ६ जनामाथि नै थप अनुसन्धान प्रक्रिया अगाडि बढाइएको छ। सार्वजनिक शान्ति विरुद्धको कसुर वा अन्य सम्बन्धित मुद्दामा उनीहरूमाथि कानुनी कारबाही चलाउने तयारी प्रहरीले गरेको छ।