पोखरा,१२ वैशाख । कास्की प्रहरीले जिल्लाभित्र लागूऔषध कारोबार, गुण्डागर्दी र सामाजिक अशान्ति फैलाउने विरुद्ध सुरु गरेको ‘स्वीप अप्रेसन’लाई थप तीव्र पारेको छ। यसै सिलसिलामा प्रहरीले गएराति शुक्रबार मात्रै थप ६१ जनालाई नियन्त्रणमा लिएको छ।

जिल्ला प्रहरी कार्यालय कास्की र मातहतका कार्यालयहरूले वैशाख १० गते साँझ ९ बजेदेखि वैशाख ११ गते बिहान ६ बजेसम्म पोखराका विभिन्न स्थानमा विशेष अपरेशन चलाएका थिए। समाजमा धम्की दिने, टोले गुण्डागर्दी गर्ने, लागू औषध सेवन तथा बिक्री गर्ने र रातिको समयमा शंकास्पद रूपमा हिँडडुल गर्नेहरूलाई नियन्त्रणमा लिइएको प्रहरी निरीक्षक एवं सूचना अधिकारी गणेश पाण्डेले जानकारी दिएका छन् ।

कहाँबाट कति पक्राउ परे?
मोहरियाटोल र गैह्रापाटन (वडा २ र ४) : १४ जना
लेकसाइड र ड्यामसाइड (वडा ६) : २४ जना
बगाले टोल, सभागृह, शिवालय र पृथ्वीचोक (वडा ८ र ९): ८ जना
काँहुडाँडा, काँहुखोला र रामबजार (वडा १३ र १५) : २ जना
सराङकोट, लामागाउँ र भलाम (वडा १८ र २०) : ४ जना
सुन्दरबजार, रिठ्ठेपानी, सैनिक बस्ती र खुदिखोला (वडा २६, २७, २९ र ३०) : ९ जना

अघिल्लो दिन पक्राउ परेका १२२ जनाको अवस्था :
यसैगरी, वैशाख १० गते पक्राउ परेका १२२ जनामाथि गरिएको कानुनी कारबाहीको विवरण पनि प्रहरीले सार्वजनिक गरेको छ। जसमध्येः
८ जनालाई लागू औषध सम्बन्धी कसूरमा म्याद थप गरी अनुसन्धान भइरहेको छ।
२७ जनालाई सार्वजनिक हित, स्वास्थ्य, सुरक्षा र नैतिकता विरुद्धको कसूरमा म्याद थप गरिएको छ।
१५ जनालाई जिल्ला प्रशासन कार्यालयबाट जरिवाना गरी छाडिएको छ।
७० जनालाई पहिलोपटकका लागि सम्झाई–बुझाई गरी आफन्तको जिम्मा लगाइएको छ भने २ जना अझै होल्डमा रहेका छन्।

जिल्ला प्रहरी कार्यालय कास्कीले समाजमा शान्ति सुरक्षा कायम गर्न र आपराधिक गतिविधि न्यूनीकरण गर्न यो अभियानलाई निरन्तरता दिने स्पष्ट पारेको छ।