पोखरा, ५ वैशाख । जिल्ला प्रहरी कार्यालय कास्कीले पर्यटकीय क्षेत्र लेकसाईडमा आन्तरिक तथा बाह्य पर्यटकहरूलाई अनावश्यक दुःख दिने, लुटपाट गर्ने र अनैतिक कृत्यमा संलग्न १६ जना महिलाहरूलाई पक्राउ गरेको छ।

प्रहरीका अनुसार, लेक्साइड एरियामा रातिको समयमा विभिन्न महिलाहरूले पर्यटकहरूलाई विभिन्न बहानामा दुःख दिई लुटपाट गर्ने र अनैतिक क्रियाकलाप बढ्दै गएको गुनासो आएपछि प्रहरीले विशेष अभियान सञ्चालन गरेको थियो। शनिबार ४ गते राति साढे ९ बजेदेखि १२ बजेसम्म जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको प्रहरी टोलीले पोखरा महानगरपालिका वडा नं. ६ लेक्साइड क्षेत्रमा छापा मारेको थियो।

उक्त अभियानका क्रममा विभिन्न किसिमका प्रलोभन देखाई पर्यटकहरूलाई दुःख दिने, लुटपाट गर्ने र अनैतिक कार्यमा संलग्न १६ जना महिलाहरूलाई नियन्त्रणमा लिई आवश्यक कारबाही प्रक्रिया अघि बढाइएको प्रहरीले जनाएको छ।

पर्यटकीय नगरी पोखराको लेकसाइड क्षेत्रमा बाउन्सरको दादागिरी, पर्यटकमाथि कुटपिट तथा अवैध यौन धन्दा नियन्त्रणमा आएको छ । वडा प्रहरी कार्यालय बैदाममा डीएसपी नमराज भट्टराई सरुवा भएर आएलगत्तै यस्ता गतिविधिहरुमा कमि आएको हो ।

जिल्ला प्रहरी कार्यालय कास्कीका प्रहरी निरीक्षक गणेश पाण्डेले पर्यटकहरूको सुरक्षा र लेक्साइड क्षेत्रलाई व्यवस्थित बनाउने उद्देश्यले यो अभियान सञ्चालन गरिएको जानकारी दिए । प्रहरी निरीक्षक पाण्डेले यस्ता गतिविधि गर्नेहरूलाई कडा कारबाही गर्ने चेतावनी दिएका छन् ।

यो पक्राउले पर्यटकीय नगरी पोखराको छवि सुधार्न र पर्यटकहरूको सुरक्षित बसाइ सुनिश्चित गर्न महत्वपूर्ण भूमिका खेल्ने अपेक्षा गरिएको छ। पक्राउ परेकाहरूमाथि थप अनुसन्धान भइरहेको प्रहरीले बताएको छ।

पर्यटकीय नगरी पोखराको लेकसाइड क्षेत्रमा बाउन्सरको दादागिरी, पर्यटकमाथि कुटपिट तथा अवैध यौन धन्दा नियन्त्रणमा आएको छ । वडा प्रहरी कार्यालय बैदाममा डीएसपी नमराज भट्टराई सरुवा भएर आएलगत्तै यस्ता गतिविधिहरुमा कमि आएको हो ।

डीएसपी भट्टराईले संलग्न सबै पक्षमाथि कडा कारबाही सुरु गरेपछि बाउन्सरको दादागिरी र पर्यटकमाथि कुटपिटका घटनामा उल्लेख्य कमी आएको छ। यसअघि वेटर कुटेको घटनामा भारतीय पर्यटक र बाउन्सरहरूलाई पक्राउ गरी तीव्र कारबाही गर्दा यस्ता घटना दोहोरिएका छैनन्। रात्रिकालीन व्यवसायमा पाहुनालाई कुट्ने र पाहुनाले वेटर पिट्ने पुरानो प्रवृत्ति लगभग अन्त्य भएको प्रहरीले जनाएको छ।

वडा प्रहरी बैदामले व्यूटिपार्लर, मसाज सेन्टर, क्यासिनो, दोहोरी रेस्टुरेन्ट लगायतका ठाउँमा बारम्बार छापा मार्दै कडा निगरानी बढाएको छ। अवैध ‘ह्यापी एन्डिङ’ मसाज, यौन व्यापार र अन्य अनैतिक गतिविधिमा संलग्न सञ्चालक तथा कामदारहरूलाई पक्राउ गर्ने क्रम जारी छ।