पोखरा, ५ वैशाख । जिल्ला अदालत कास्कीमा सहकारी ठगीमा संलग्न भएर धरौंटीमा रिहा भएकाहरुले धमाधम रोक्का बैंक खाता र सम्पत्ति फुकुवाको माग गर्दै कानुनी प्रक्रिया अघि बढाईरहँदा पीडितहरु झनैं अन्यायमा पर्ने देखिएको छ । बचतकर्ताको बचत सुनिश्चिता नगर्दै अदालतमा अर्को खेल सुरु हुन थालेको छ ।

सूर्यदर्शन बचत तथा ऋण सहकारी संस्थाको ठगी प्रकरणमा मुद्दा चलिरहेको अवस्थामा मुख्य अभियुक्त गितेन्द्र बाबु राई (जीबी) की प्रेमिका लीला पछाई (मुद्दा ०८२-FN-१०३६) सहित चारजनाले रोक्का राखिएका बैंक खाता र सम्पत्ति फुकुवा लगायतको माग गर्दै जिल्ला अदालत कास्कीमा निवेदन दिएका छन् ।

जसमा गण्डकी प्रदेशकी पूर्व सांसद मीना गुरुङ, संस्थाकी पूर्व कोषाध्यक्ष आरती गुरुङ र तदर्थ सञ्चालक समितिका उपाध्यक्ष कृष्णबहादुर गुरुङले रोक्का रहेका बैंक खाता, शेयर खाता, विमा खाता तथा जग्गा सम्पत्ति फुकुवा गर्न निवेदन दिएका हुन् ।

लीला पछाईले वैशाख २ गते अदालतमा निवेदन दिई मुद्दा प्रक्रिया अघि बढाइसकेकी छन् भने मीना गुरुङ, आरती गुरुङ र कृष्णबहादुर गुरुङले पनि सोही मागसहित निवेदन दिएका छन् । सहकारी ठगी, सम्पत्ति शुद्धीकरण र संगठित अपराधको मुद्दामा अदालतले यस्ता रोक्का सम्पत्ति फुकुवा गरेमा १८ हजार ७ सय बचतकर्ताको अर्बौं रुपैयाँ कसरी सुरक्षित र फिर्ता हुन्छ भन्ने गम्भीर प्रश्न उब्जिएको सहकारी बचत पीडित संघ कास्कीका अध्यक्ष किरण श्रेष्ठको भनाई छ ।

सहकारी बचत पीडित संघ कास्कीका अध्यक्ष श्रेष्ठले भने–‘बचतकर्ताहरु अब झनै सचेत हुनुपर्ने देखिएको छ । भागेका कैदीहरु पक्राउ भएका छैनन् । जीबी राईको अत्तोपत्तो छैन । ६३ जनामा ५५ जना फरार छन् । संगठित अपराध, सहकारी ठगी र सम्पत्ति शुद्धिकरण जस्तो गम्भिर मुद्दामा अभियुक्तहरुलाई यसरी धमाधम रोक्का गरिएका खाता र सम्पत्ति फुकुवा अदालतले गरिदिए हामी पीडितहरुले न्याय खोज्न कहाँ जाने ?’प्रहरी अनुसन्धान र अभियोगपत्रअनुसार लीला पछाई जीबी राईको सामान्य कर्मचारीबाट प्रेमिका बन्दै सहकारीको ३ करोडभन्दा बढी रकम अपचलनमा संलग्न भइन् । उनको नाममा पोखरामा दुईवटा घर, ललितपुर खुमलटारमा घर, बुटवलमा जग्गा, गाडी, गरगहना र फिक्स्ड डिपोजिट छन् । जीबी राईसँग मिलेर उनले १८ करोड ४८ लाख ८ हजार ८५ रुपैयाँ क्रिप्टोकरेन्सी (बाइनान्स र भीट्याब्स) मा लगानी गरेको प्रहरीले फेला पारेको छ । पछाईले जीबी राईको मोबाइल बैंकिङ एप चलाएर, विश्वविक्रम राई मार्फत विदेशी डिजिटल वालेटमा रकम पठाएको बयान दिएकी छन् ।

यो प्रकरणमा कुल ६३ जनाविरुद्ध मुद्दा चलेको छ, जसमध्ये ५५ जना अझै फरार छन् । मुख्य अभियुक्त जीबी राईको विषयमा सरकार मौन छ भने लीला पछाईसहित चारै जनाले रोक्का सम्पत्ति फुकुवा गर्न खोजिरहेका छन् । अदालतले यस्तो माग स्वीकार गरे बचतकर्ताहरू झन् ठूलो मर्कामा पर्ने निश्चित छ । संस्थाको १ अर्ब ३५ करोडभन्दा बढी बचत अपचलन भएको प्रतिवेदन छ, जसमध्ये लीला पछाईबाट मात्र २ करोड ७५ लाखभन्दा बढी असुल गर्नुपर्ने र क्रिप्टो कारोबारबाट १८ करोड ४८ लाख असुल गर्नुपर्ने अभियोगपत्रमा उल्लेख छ ।

लीला पछाई गुल्मी मुसिकोटकी ३२ वर्षीया महिला हुन् । उनी जीबी राईको संगतले विलासी जीवन बिताइरहेकी थिइन् । सहकारीबाट प्राइम बैंकमा ५० लाख, जीबीको खाताबाट १ करोड ५० लाख जम्मा भएको, स्वर्णलक्ष्मी सहकारीमा ५० लाख फिक्स्ड डिपोजिट गरेको र उक्त रकम घर–जग्गा, गाडी किन्न खर्च गरेको उनले बयानमा स्वीकारेकी छन् ।

अर्कोतर्फ, तदर्थ समिति र प्रारम्भिक सञ्चालक समितिमा रहेका मीना गुरुङ (पूर्व प्रदेश सांसद, मुद्दा ०८२-FN-०६०४), उनका बुबा कृष्णबहादुर गुरुङ (उपाध्यक्ष) र आरती गुरुङ (कोषाध्यक्ष)ले संस्थाको स्थापना कालमै १ करोड ५४ लाख ४९ हजार ८३६ रुपैयाँ अपचलन भएको अभियोग सामूहिक दायित्वमा परेको छ । उनीहरूको नाममा ५३ लाख ७६ हजार ३०८ रुपैयाँको दायित्व कायम छ ।

बचतकर्ताहरूले अब सचेत हुनुपर्ने समय आएको छ । यदि अदालतले ठगीको मुद्दा चलिरहेका व्यक्तिका खाता, शेयर, विमा र जग्गा फुकुवा गर्दै गयो भने सहकारी ठगीको यो ठूलो प्रकरणमा पीडित बचतकर्ताले आफ्नो पैसा फिर्ता पाउने सम्भावना झन् क्षीण हुने देखिन्छ ।