पोखरा, ११ पुस। लामो समयदेखि नेपाली कांग्रेसको संगठनमा सक्रिय रहेका कास्की क्षेत्र नं. १ का महाधिवेशन प्रतिनिधि होम बहादुर बस्याल (बिमल) ले पार्टीको क्रियाशील राजनीतिबाट विश्राम लिने निर्णय गरेका छन् । उनले महाधिवेशन प्रतिनिधिको जिम्मेवारीसहित पार्टीको कुनै पनि पदमा नरहने गरी राजीनामा दिएको जानकारी गराएका छन् ।

बस्यालले जारी गरेको विज्ञप्तिमा आफ्नो राजनीतिक यात्राको संक्षिप्त समीक्षा गर्दै भनेका छन्, ‘विगत लामो समयदेखि नेपाल विद्यार्थी संघ र तरुण दल हुँदै नेपाली कांग्रेसको क्रियाशील सदस्यको रूपमा यात्रा गरें । १४औं महाधिवेशनबाट महाधिवेशन प्रतिनिधि बन्ने अवसर प्राप्त गरें । नेपाली कांग्रेसलाई बलियो र संगठित बनाउन हरसम्भव प्रयत्न गरें । महान् नेता बीपी कोइरालाको जीवनी पढेर हुर्किएको म, बीपी, गणेशमान सिंह र कृष्णप्रसाद भट्टराईजस्ता नेताहरूको कांग्रेसको सिपाही बन्ने प्रयासमा सदैव लागिपरेको थिंए । त्यसमा कति सफल भएँ, त्यो नेतृत्व र आमजनताले मूल्यांकन गरिसकेका होलान् ।’

उनले वर्तमान राजनीतिक परिदृश्यप्रति गम्भीर असन्तुष्टि व्यक्त गर्दै देश कुशासन, भ्रष्टाचार, बेथिति र राजनीतिक लुछाचुडीको दलदलमा फसेको बताएका छन् । ‘यो सामान्य कुरा होइन, यो देश र जनताप्रति गम्भीर लापरबाही र विश्वासघात हो,’ उनले लेखेका छन्, ‘यस्ता कार्यले मेरो र आउने पुस्ताको भविष्यमाथि दलहरूले गरेको बेइमानी छरपष्ट भएको छ ।’

तथापि, उनले आफूले पसिना र रगतले सिंचेको नेपाली कांग्रेस यस्ता जालझेल र समस्याबाट छिट्टै मुक्त होस् भन्ने कामना व्यक्त गरेका छन् । ‘लोकतान्त्रिक पार्टी कमजोर हुँदा देशको लोकतन्त्र पनि कमजोर बन्छ । त्यसैले देशको लोकतन्त्र बलियो बनाउन कांग्रेस पनि बलियो भएर उभियोस्,’ उनको भनाइ छ ।

प्रजातन्त्र र लोकतन्त्रमा विश्वास राख्ने एक जिम्मेवार नागरिकको हैसियतले देश दलदलमा फसेको बेला चुप लागेर बस्न नसक्ने बताउँदै बस्यालले भनेका छन्, ‘कांग्रेस निर्माणको सुरुवाती दिनमा शहीद भएका र बलियो कांग्रेसमार्फत सबल नेपालको संरचना बनाउने सोच राख्ने श्रद्धेय नेताहरूको योगदान र आजको कांग्रेसको पथ फरक भएकोमा दुईमत छैन । समाज रूपान्तरणका लागि पहिला आफैं रूपान्तरित हुन जरुरी छ भन्ने विश्वासका साथ म वर्तमान नेपाली कांग्रेसको क्रियाशील राजनीतिबाट विश्राम लिने निर्णयमा पुगेको छु ।’

उनले यसै विज्ञप्तिमार्फत नेपाली कांग्रेसको महाधिवेशन प्रतिनिधिसहित कुनै पनि पदमा नरहने गरी राजीनामा दिएको औपचारिक जानकारी गराएका छन् । बिमल नेपाली कांग्रेसको विद्यार्थी तथा युवा संगठनबाट राजनीतिमा प्रवेश गरेका पुराना तथा सक्रिय कार्यकर्ता मानिन्छन् । उनको यो निर्णयले कास्कीको कांग्रेस राजनीतिमा नयाँ तरंग ल्याउने अनुमान गरिएको छ ।