काठमाडौँ । नेकपा (माओवादी केन्द्र) र नेकपा (एकीकृत समाजवादी) नेतृत्वका ८ कम्युनिष्ट घटकहरूबीच आइतबार पेरिसडाँडामा बसेको बैठकले १८ बुँदे सहमतिपत्रमा हस्ताक्षर गरेको छ । यो सहमतिले संघीय गणतन्त्र जोगाउने, राष्ट्रिय स्वाधीनता बलियो बनाउने, सुशासन कायम गर्ने, सामाजिक न्याय दिने र आर्थिक–सामाजिक रूपान्तरण गर्दै समाजवादी क्रान्ति पूरा गर्ने बृहत् कम्युनिस्ट एकताको ढोका खोलेको नेताहरूले बताएका छन् ।

सहमतिमा नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी, नेकपा (समाजवादी जनसमाजवादी पार्टी, नेपाल), नेकपा (माओवादी समाजवादी) र नेकपा (साम्यवादी) गरी ८ दल सामेल छन् ।

आगामी कात्तिक १९ गते सबै घटकका केन्द्रीय समितिको संयुक्त भेला अर्थात् एकता राष्ट्रिय सम्मेलनबाट नयाँ पार्टीको घोषणा गरिनेछ । त्यही दिन घोषणापत्र, अन्तरिम विधान पारित हुनेछन् र केन्द्रीय समिति गठन हुनेछ । छ महिनाभित्रै एकता राष्ट्रिय महाधिवेशन पनि बोलाइने छ ।

नयाँ पार्टीले मार्क्सवाद–लेनिनवादलाई मार्गदर्शक सिद्धान्त बनाउनेछ भने नेपाली विशेषताको वैज्ञानिक समाजवादलाई कार्यक्रम बनाउनेछ । तत्कालका लागि पुँजीवादी जनवादी क्रान्तिका उपलब्धि जोगाउने, राष्ट्रिय स्वाधीनता संरक्षण गर्ने, सुशासन कायम गर्ने, सामाजिक न्याय दिने र आर्थिक समृद्धि ल्याउँदै समाजवादको आधार तयार पार्ने रणनीति अपनाइनेछ ।

आन्दोलन मुख्य रूपमा शान्तिपूर्ण रहनेछ तर आवश्यक परे सडक, संसद् र सरकार सबै मोर्चा प्रयोग गरिनेछ ।

केन्द्रीय समिति सहभागी सबै दलका पुराना केन्द्रीय समितिलाई समायोजन गरेर आपसी सहमतिमा गठन गरिनेछ । यसमा राजनीतिक समिति, सचिवालय र कार्य संयोजन समिति रहनेछन् । केन्द्रदेखि वडा तहसम्म संयोजक र सहसंयोजकको व्यवस्था हुनेछ ।

सबै तहका समिति र जनसंगठनमा इन्चार्ज तथा सहइन्चार्ज, संयोजक तथा सहसंयोजक सहभागी घटकबाटै राख्ने प्रयास गरिनेछ । कुनै पनि सदस्य दुई तहसम्म रहन सक्नेछन् । समितिहरू सामूहिक नेतृत्वमा जनवादी केन्द्रीयताका आधारमा सञ्चालन हुनेछन् ।

एकता घोषणापछि राजनीतिक प्रतिवेदन र कार्यक्रम तयार गर्न कार्यदल गठन गरिनेछ भने संगठनात्मक समायोजनका लागि पनि विभिन्न तहमा कार्यदल बन्नेछन् ।

केन्द्र, प्रदेश, जिल्ला, पालिका र वडा तह कार्यकारी रहनेछन् । संघ र प्रदेश निर्वाचन क्षेत्रमा समन्वय समिति तथा टोल र प्रारम्भिक तहमा संगठन समिति रहनेछन् ।

पार्टीको नाम अझै टुंगो लागेको छैन तर चुनाव चिन्ह पाँचकुने तारा हुने सहमति भएको छ । वैचारिक–राजनीतिक मतभेद भए निरन्तर छलफल गरेर महाधिवेशनमा टुंगो लगाइने छ । सबै काम सहमति र समझदारीमै गरिने नेताहरूले प्रतिबद्धता जनाएका छन् ।