काठमाडौँ, , १२ असोज । गृह मन्त्रालयले जेनजी प्रदर्शनका क्रममा पक्राउ परेकाहरूलाई छानबिन गरेर रिहा गर्न प्रहरीलाई निर्देशन दिएको छ। गम्भीर अपराधमा संलग्न नभएका प्रदर्शनकारीहरूलाई हिरासतबाट मुक्त गर्ने प्रक्रिया प्रहरीले सुरु गरेको छ।

भदौ २४ गतेको प्रदर्शनमा उच्छृङ्खल गतिविधि गरेको आरोपमा काठमाडौँबाट ४३ र ललितपुरबाट २२ जना पक्राउ परेका थिए। गृह मन्त्रालयले सामान्य गतिविधिमा संलग्न र प्रहरीको पोशाक लगाएर भिडियोमा देखिएकाहरूलाई पक्राउ नगर्न वा पक्राउ परेका भए रिहा गर्न भनेको छ। तर, गम्भीर अपराध र हातहतियार सम्बन्धी मुद्दामा संलग्नहरूमाथि कानुनी कारबाही अघि बढ्ने प्रहरीले जनाएको छ।
प्रहरी प्रधान कार्यालयले यो निर्देशनअनुसार देशभर छानबिन गरी पक्राउ परेकाहरूलाई रिहा गर्न थालेको छ।

गृह मन्त्रालयले असोज ९ गते विज्ञप्ति जारी गर्दै उच्चस्तरीय जाँचबुझ आयोगको प्रतिवेदन आएपछि मात्रै प्रदर्शन सम्बन्धी कारबाही अघि बढ्ने बताएको छ। तर, गैरकानुनी गतिविधिमा संलग्नहरूलाई कानुनअनुसार कारबाही हुने मन्त्रालयले स्पष्ट पारेको छ।

वरिष्ठ अधिवक्ता भीमार्जुन आचार्यले यो निर्णयले प्रदर्शनका क्रममा भएका गलत गतिविधिलाई लुकाउन खोजिएको हुन सक्ने भन्दै आलोचना गरेका छन्। उनले सामाजिक सञ्जालमा आयोगको बहानामा अपराधीलाई कारबाही नगर्नु गलत भएको बताए।

उच्चस्तरीय जाँचबुझ आयोगको नेतृत्व विशेष अदालतका पूर्वअध्यक्ष गौरीबहादुर कार्कीले गरेका छन्। आयोगमा पूर्व एआईजी विज्ञानराज शर्मा र कानुनविद् विन्देश्वरी भण्डारी सदस्य छन्।