पोखरा, ९ असोज । नेपाली कांग्रेस गण्डकी प्रदेशको कार्यसम्पादन समितिको बैठकले जेनजी आन्दोलन र देशमा उत्पन्न राष्ट्रिय संकटका विषयमा महत्त्वपूर्ण निर्णयहरू गरेको छ। प्रवक्ता माधव प्रसाद बास्तोला (मधु)का अनुसार बैठकले देशको पछिल्लो परिस्थितिलाई गम्भीर रूपमा लिएको छ।

बैठकले २०८२ भाद्र २३ र २४ गते भएको जेन–जी आन्दोलनका क्रममा भएको धनजनको क्षतिबारे प्रदेश समितिले जारी गरेको विज्ञप्तिलाई अनुमोदन गरेको छ। आन्दोलनमा सहादत प्राप्त गर्नेहरूप्रति श्रद्धाञ्जली र घाइतेहरूको शीघ्र स्वास्थ्यलाभको कामना गर्दै क्षतिबारे न्यायिक छानबिन गर्न माग गरिएको छ। साथै, आन्दोलनका जायज मागहरूलाई समर्थन गर्दै राजनीतिक दलहरूबीच छलफल र समन्वय गर्ने निर्णय भएको छ।

नेपाली कांग्रेसका सभापति शेरबहादुर देउवासहित नेताहरूमाथि भएको सांघातिक आक्रमणको कडा निन्दा गरिएको छ र उनीहरूको शीघ्र स्वास्थ्यलाभको कामना गरिएको छ। विषम परिस्थितिमा कार्यकर्ता र नागरिकलाई संयमित रही कर्तव्यमा निरन्तरता दिन अनुरोध गरिएको छ।

बैठकमा जेनजी आन्दोलनले सिर्जना गरेको राष्ट्रिय संकट, अन्तरिम सरकार, संसद् विघटन, निर्वाचन, र संविधान संशोधनजस्ता विषयमा गहन छलफल भएको छ। नेपाली कांग्रेसले राष्ट्रियता, प्रजातन्त्र, समाजवाद र धार्मिक स्वतन्त्रताका मुद्दामा शीघ्र निर्णय लिन पार्टीका उपयुक्त निकायमार्फत निकास खोज्ने प्रतिबद्धता जनाएको छ। प्रवक्ता बास्तोलाले अर्को बैठकबाट थप निर्णय लिइने बताए।