काठमाडौं, २९ भदौं । नेपालले इतिहास रच्दै पहिलो महिला महान्यायाधिवक्ताको रूपमा वरिष्ठ अधिवक्ता सविता भण्डारी बराललाई नियुक्त गरेको छ। प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले भण्डारीलाई महान्यायाधिवक्ताको जिम्मेवारी सुम्पेका हुन्।

राष्ट्रपति कार्यालयका प्रेस सल्लाहकार किरण पोखरेलले प्रधानमन्त्रीको सिफारिसअनुसार भण्डारीलाई नियुक्त गरिएको पुष्टि गरे। यस नियुक्तिसँगै नेपालले पहिलो महिला प्रधानमन्त्रीपछि पहिलो महिला महान्यायाधिवक्ता पाएको छ।

यसअघि महान्यायाधिवक्ताको पदमा रहेका रमेश बडालले आइतबार राजीनामा दिएका थिए, जसलाई राष्ट्रपति पौडेलले स्वीकृत गरेका थिए। महान्यायाधिवक्ताले सरकारको कानुनी सल्लाहकारको रूपमा महत्वपूर्ण भूमिका निर्वाह गर्छन्।

प्रधानमन्त्री सुशीला कार्कीले पहिलो महिला प्रधानमन्त्रीको कीर्तिमान बनाएजस्तै महान्यायाधिवक्ताको पदमा पनि महिलालाई अवसर प्रदान गर्दै इतिहास रचेकोमा सर्वत्र प्रशंसा भएको छ।