पोखरा, २८ वैशाख । मतदान गर्न दुई दिन बाँकी रहेसँगै मंगलबार मध्यरातिदेखि मौन अवधि शुरु भएको छ । मतदान हुने दिनको अघिल्लो ४८ घण्टादेखि मतदान नसकिन्जेलसम्मको अवधिलाई मौन अवधि भनिन्छ । आउँदो शुक्रबार देशभरका सातसय ५३ पालिकामा एकै चरणमा हुन लागेको र त्यसको सम्पूर्ण तयारी पुरा भएको निर्वाचन आयोगले जानकारी दिएको छ ।

मौन अवधि शुरु भएसँगै अब चुनावको प्रचारप्रसार भने गर्न पाइँदैन । मतदातालाई प्रभाव पार्ने गरी कुनै पनि किसिमका गतिविधि गर्न आयोगले पूर्ण बन्देज लगाएको छ । मौन अवधिमा कतिपय उम्मेदवारहरुले मतदातालाई पैसाको प्रलोभन देखाउने, शक्तिको त्रासमा पार्ने लगायतका गतिविधिहरु भित्रभित्रै हुने हुँदा यसतर्फ निर्वाचन आयोग चनाखो रहेको जनाएको छ ।

वैशाख ३० गते शुक्रबार बिहान ७ देखि साँझ ५ बजेसम्म देशभर मतदान हुँदैछ । मौन अवधिमा उम्मेदवार‚ राजनीतिक दल‚ तिनका भ्रातृ संगठनले कुनै पनि प्रकारका कार्यशाला, गोष्ठी‚ अन्तरक्रिया, सम्मेलन वा निर्वाचनसँग सम्बन्धित छलफलमा गर्न नपाउने निर्वाचन आचारसंहिता २०७८ मा उल्लेख छ ।

यस्तै‚ कुनै पनि माध्यमबाट मत माग्न वा निर्वाचन प्रचारप्रसार गर्न नपाइने आचारसंहितामा जनाइएको छ। सामाजिक सञ्जाल‚ अनलाइन‚ छापा वा अन्य माध्यमबाट दल वा उम्मेदवारको पक्षा वा विपक्षमा कुनै सन्देश‚ सूचना वा प्रचारप्रसार सामग्री पोस्ट वा शेयर गर्न/गराउन नपाइने उल्लेख छ।

आचारसंहिताको ५ (छ) मा भनिएको छ, ‘मौन अवधिमा सामाजिक सञ्जालमा राजनीतिक दल वा उम्मेदवारको पक्ष वा विपक्षमा कुनै सन्देश, सूचना, प्रचार-प्रसारका सामग्री पोस्ट वा शेयर गर्न वा सामाजिक सञ्जालमार्फत मत माग्न पनि पाइदैन।’

मौन अवधि शुरु हुनुभन्दा अगाडि राजनीतिक दला वा उम्मेदवारको प्रचारप्रसार सामग्री राखिएको भए हटाउनुपर्ने छ । निर्वाचन वैशाख ३० गते हुँदैछ। ७५३ स्थानीय तहको ३५ हजार २२१ जनप्रतिनिधिका लागि चुनावी प्रतिस्पर्धामा एक लाख ४५ हजार ११ जना छन्। ती मध्ये ५५ हजार ६९८ महिला र ८९ हजार ३१३ पुरुष छन्। ३९० जना निर्विरोध निर्वाचित भइसकेका छन्।