पोखरा, ११ वैशाख । यहीँ वैशाख ३० गते हुने स्थानीय निर्वाचनका लागि पोखरा महानगरपालिकाको मेयरमा १० र उपमेयरमा २ जनाले उम्मेदवारी दर्ता गराएका छन् । आज र भोलि मनोनयन दर्ता गर्न पाईने भएसँगैं सत्तारुढ गठबन्धनको पाँच दल र विपक्षी नेकपा एमाले भित्रको विवाद नटुंगिएसँगै भोलिमात्र दलहरुले मनोनयन दर्ता गर्ने भएका छन् ।

पोखराको सहिदचोकस्थित उपत्यका नगर विकास समितिको कार्यालयमा रहेको मुख्य निर्वाचन अधिकृतको कार्यालयमा आज पहिलो दिन राजनीतिक दलबाट मौलिक जराकिलो पार्टीबाट संजय तिमिल्सिना, सचेत नेपाली पार्टीबाट भोजराज खनाल, मंगोल नेशनल अर्गनाइजेसनबाट प्रेमप्रसाद गुरुङ र नेपाल जनता दलबाट मुक्तिनाथ सुवेदीले मेयरमा उम्मेदवारी दिएका छन्।

त्यसैगरी, स्वतन्त्रबाट मेयरमा गनेस पौडेल, विमलबहादुर कार्की, रामराज अधिकारी, डिलबहादुर गुरुङ, नवराज बास्तोला र किशानसिंह गुरूङले उम्मेदवारी दर्ता गराएका छन् । यस्तै, उपमेयरमा सचेत नेपाली पार्टीबाट सोनी परियार र मंगोल नेशनल अर्गनाइजेसनबाट रामबहादुर तामाङले उम्मेदवारी दिएका छन् ।