पोखरा ।  गण्डकी प्रदेशमा कोरोना सङ्क्रमित दुई जनाको मृत्यु भएको छ । गण्डकी प्रदेशमा कोरोना कारण मृत्यु हुनेको संख्या ५६ पुगेको छ । कोरोना सङ्क्रमितको सङ्ख्या छ हजार ८७ जना पुगेको छ । मङ्गलबार मात्रै प्रदेशमा १२७ जना कोरोना सङ्क्रमित थपिएका छन् ।

पोखरा महानगरपालिका वडा नं २२ का ४४ वर्षीय पुरुषको गण्डकी मेडिकल कलेज पोखरामा आज निधन भएको गण्डकी प्रदेश स्वास्थ्य निर्देशनालयका निर्देशक एवम् गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोदविन्दु शर्माले जानकारी दिनुभयो । कात्तिक ३ गते कोरोना पुष्टि भएका निजमा कोरोना सहित निमोनिया र श्वासप्रस्वास सम्बन्धी समस्या रहेको निर्देशनालयले जनाएको छ । गण्डकी प्रदेशमा कोरोना सङ्क्रमणका कारण मृत्यु हुनेको सङ्ख्या ५६ पुगेको छ ।

त्यसैगरी कार्तिक ४ गते राती ८ः२५ बजेको समयमा उपचारका क्रममा म्याग्दी जिल्ला धौतागिरी गाउँपालिका वडा नं. ७ निवासी ८५ वर्षीय पुरुषको मृत्यु भएको पोखरा स्वास्थ्य विज्ञान प्रतिष्ठानका निर्देशक तथा सह.प्रा.डा.अर्जुन आचार्यले जानकारी दिनुभयो । उहाँका अनुसार असोज २९ गते कोभिड–१९ संक्रमण भई पश्चिमाञ्चल क्षेत्रीय अस्पताल अन्तर्गत कोभिड–१९ उपचार केन्द्रमा आई.सि.यु.मा भर्ना गरी उपचार गराई रहेका ती पुरुषको कोभिड–१९, बाईल्याट्रल निमोनिया र एक्युट किड्नी ईन्फेक्सन लगायतका कारण मृत्यु भएको अस्पतालले जनाएको छ । कोभिड–१९ पोजेटिभ भई पोखरा विज्ञान प्रतिष्ठानमा उपचारका क्रममा १५ जनाको मृत्यु भईसकेको छ ।

गण्डकी प्रदेशमा थप २० जनामा कोरोना सङ्क्रमण पुष्टि भएको गण्डकी प्रदेश स्वास्थ्य निर्देशनालयले आज जारी गरेको विज्ञप्तिमा उल्लेख छ ।