News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

सरकारको प्रतिशोधविरुद्ध आन्दोलनको तयारी गर्न कार्यकर्तालाई ओलीको निर्देशन

काठमाडौं, २ मङ्सिर । नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले वर्तमान सरकार विरुद्ध कडा प्रतिरोधात्मक आन्दोलनको तयारी गर्न पार्टी पंक्तिलाई आह्वान गरेका छन्। राष्ट्रिय कार्यकर्ता भेलालाई सम्बोधन गर्दै अध्यक्ष ओलीले सरकार कुनै पनि संवैधानिक मर्यादा, कानुन र लोकतान्त्रिक मूल्यमान्यताविपरीत चल्दै एमालेविरुद्ध प्रतिशोधको राजनीतिमा उत्रिएको गम्भीर आरोप लगाएका छन्।

वर्तमान सत्ता गठबन्धन र सरकारको कार्यशैलीप्रति तीव्र आक्रोश पोख्दै अध्यक्ष ओलीले जुनसुकै बेला सरकारले एमाले नेतृत्व र कार्यकर्तामाथि धरपकड तथा हमला गर्न सक्ने चेतावनी दिए। कानुनको शासन मान्न तयार नरहेको भन्दै उनले सरकारका प्रत्येक स्वेच्छाचारी र गैरकानूनी कदमको डटेर सामना गर्नुपर्ने बताए।

भेलामा आफ्नो सम्भावित गिरफ्तारीबारे लामो चर्चा गर्दै ओलीले विगतमा झैँ अब एमाले चुपचाप नबस्ने स्पष्ट पारे। विगतको गिरफ्तारीको प्रसंग कोट्याउँदै उनले यसपटक दमन भएमा हजारौँ होइन, लाखौँको सङ्ख्यामा एमाले कार्यकर्ताहरू सडकमा उत्रने र त्यसको महँगो मूल्य सरकारले चुकाउनुपर्ने चेतावनी दिए। साथै, उनले नयाँ नियुक्त प्रहरी महानिरीक्षक (आईजीपी)ले समेत राजनीतिक प्रतिशोध साँध्न प्रमुख नेताहरूलाई पक्राउ गर्ने धम्की दिएको गम्भीर दाबी गरे।

सरकारको निर्मम दमन र हमलाको कडा प्रतिवाद गर्नुपर्ने आवश्यकता औँल्याउँदै अध्यक्ष ओलीले सम्पूर्ण अगुवा कार्यकर्ताहरूलाई हरक्षण उच्च सतर्कताका साथ आन्दोलनको सम्पूर्ण तयारी अवस्थामा रहन कङ्क्रिट निर्देशन दिएका छन्।

डनन्यूज ट्रेन्डिङ