पोखरा, ३ असोज । जिल्ला प्रहरी कार्यालय कास्कीले पोखराबाट ठूलो परिमाणमा प्रतिबन्धित लागूऔषधसहित ६ जनालाई पक्राउ गरेको छ। पोखरा महानगरपालिका वडा नं. ५, मालेपाटनस्थित क्षेत्रमा लागूऔषध ओसारपसार भइरहेको भन्ने विशेष सूचनाको आधारमा लागूऔषध नियन्त्रण ब्युरो शाखा कार्यालय पोखरा र वडा प्रहरी कार्यालय बैदामबाट खटिएको संयुक्त प्रहरी टोलीले उनीहरूलाई पक्राउ गरेको हो।

असोज २ गते राति अन्दाजी ८ः३० बजेको समयमा बा.प्र.०१–०३५ च १४३६ नम्बरको ईभी कार रोकी खानतलासी गर्दा गाडीभित्र लुकाएर राखिएको अवस्थामा विभिन्न किसिमका लागूऔषधहरू बरामद गरिएको जिल्ला प्रहरी कार्यालय कास्कीले जनाएको छ।
प्रहरीका अनुसार उक्त गाडीबाट डाईजापाम ४०० एम्पुल, फेनेरागन ६१३ एम्पुल, नुरफिन ६०० एम्पुल गरी जम्मा १६१३ एम्पुल र टपेण्डाडोल ९९८ चक्की लागूऔषध बरामद भएको छ।

उक्त कारमा सवार नरहेका भन्दै प्रहरीले ६ जनालाई नियन्त्रणमा लिएको छ। पक्राउ पर्नेमा पर्वतको मोदी गाउँपालिका वडा नं. ६ बस्ने ३३ वर्षीय सुरज नेपाली, सोही स्थान निवासी २८ वर्षीय प्रेम सुवेदी र ३५ वर्षीय होमबहादुर थापा रहेका छन्। त्यस्तै, रूपन्देहीको मायादेवी गाउँपालिका वडा नं. १ बस्ने २८ वर्षीय महेन्द्र आराख र सोही स्थानका ४१ वर्षीय जन्मेजय केवट पनि पक्राउ परेका छन्।

यसैगरी, कास्कीको पोखरा महानगरपालिका वडा नं. १७ बिरौटा बस्ने ३३ वर्षीय राजेन्द्र कुमार यादव पनि पक्राउ परेका व्यक्तिहरूको सूचीमा रहेका छन्। लागूऔषधसहित पक्राउ परेका उनीहरूमाथि थप अनुसन्धान भइरहेको जिल्ला प्रहरी कार्यालय कास्कीका सूचना अधिकारी तथा प्रहरी नायव उपरीक्षक वीरेन्द्र कुमार पासवानले जानकारी दिएका छन्।