रोल्पा, २८ साउन । रोल्पाको थबाङ गाउँपालिका-५ बोटलबारामा बुधबार राति गएको पहिरोमा परी मृत्यु हुनेको संख्या तीन पुगेको छ भने नौ जना अझै बेपत्ता छन् । दुई जना घाइतेको उद्धार गरिएको छ । थबाङ गाउँपालिका–५ बोटलबारामा बुधबार राति करिब ८:४० बजे घरमाथिबाट पहिरो खस्दा कमलबहादुर पुनमगरसहित छ वटा घरगोठ पुरिएका थिए ।

जिल्ला प्रहरी कार्यालय रोल्पाका अनुसार पहिरोमा परेर थबाङ-५ का ६० वर्षीय कमलबहादुर पुनमगर, १८ वर्षीया शान्ती पुनमगर र ७१ वर्षीया मनरखी पुनमगरको मृत्यु भएको छ । त्यस्तै २२ वर्षीय हिमाल पुनमगर र २५ वर्षीय संजय घर्तीमगर घाइते भएका छन् । उनीहरूलाई उपचारका लागि बाहिर लैजाने तयारी गरिएको छ ।

बेपत्ता रहेका नौ जनाको पहिचान भएको छ । जसमा ४० वर्षीया जुनकुमारी पुनमगर, ९ वर्षीय अशिम पुनमगर, ६ वर्षीय अशोक पुनमगर, ७५ वर्षीय डलबहादुर पुनमगर, ८० वर्षीय अजम्बर पुनमगर, ७८ वर्षीय बलबहादुर पुनमगर, ७२ वर्षीय लिलबहादुर पुनमगर, ७१ वर्षीया मनी पुनमगर र ६७ वर्षीया हस्तकला रोकामगर रहेका छन् ।  प्रहरीका अनुसार सुरुमा दश जना बेपत्ता भएकोमा एक जनाको शव फेला परेपछि मृतकको संख्या तीन पुगेको हो । बाँकी नौ जनाको खोजी कार्य जारी छ ।

जिल्ला प्रहरी कार्यालय रोल्पाका प्रहरी नायब उपरीक्षक (डीएसपी) पञ्चकुमार बाखुले भने, ‘बेपत्ता एक जनाको शव फेला परेको छ । अन्य नौ जनाको खोजीकार्य जारी रहेको छ ।’ प्रहरी र स्थानीयवासीको सक्रिय सहभागितामा उद्धार तथा खोजी कार्य भइरहेको छ । पहिरोको थप विवरण आउन बाँकी छ ।