पोखरा, २४ साउन । साउन महिना सुरु भएदेखि देशभर एलपी ग्यासको आपूर्ति असहज बनेको छ । काठमाडौं उपत्यकाबाट सुरु भएको यो समस्या अहिले पोखरालगायत विभिन्न जिल्लामा फैलिएको छ । आयल निगमले चार महिनासम्म आधा तौलको सिलिन्डर बिक्री गरेर गत ३१ असारदेखि फेरि पूर्ण तौलको सिलिन्डर बिक्री सुरु गरेपछि बजारमा ग्यास पाउन झनै गाह्रो भएको हो ।

निगमका अनुसार दैनिक डेढ लाख सिलिन्डर भर्न पुग्ने ग्यास आयात भइरहे पनि माग दुई लाख हाराहारी पुगेको छ । पोखरामा पनि उपभोक्ताहरू रित्तो सिलिन्डर बोकेर घण्टौं लाइनमा बस्न बाध्य छन् । जिल्ला प्रशासन कार्यालय कास्कीले शुक्रबारदेखि किराना पसलबाटै ग्यास बिक्री गर्ने व्यवस्था मिलाएको जनाए पनि नजिकका पसलहरूमा अझै ग्यास छैन ।

तर ग्यास बिक्रेताहरूले पोखरामा सोमबारसम्म आपूर्ति सहज हुने दाबी गरेका छन् । आइतबार पोखरा बजारमा करिब दस हजार भरिएका सिलिन्डर भित्रिने भएका छन् । शक्ति ग्यास कम्पनीले दुई हजार पाँच सय र गृहलक्ष्मी ग्यास कम्पनीले तीन हजारभन्दा बढी सिलिन्डर बजारमा लैजाने तयारी गरेको छ । पोखरा बाहिरका बाबा, जानकी र नेपाल ग्यास कम्पनीले पनि एक–एक हजारभन्दा बढी सिलिन्डर भित्र्याउने भएका छन् ।

जिल्ला अनुगमन समिति कास्कीले शनिबार पोखराका विभिन्न ग्यास कम्पनी र डिपोमा अनुगमन गरेको थियो । सहायक प्रमुख जिल्ला अधिकारी चित्राङ्गत बरालले सोमबारसम्म पोखरामा ग्यास सहज हुने बताउँदै अब नपाएर छट्पटाउनुपर्ने अवस्था नरहेको दाबी गरे । गृहलक्ष्मी ग्यासमा चारवटा बुलेट भारतबाट हिँडिसकेको र आइतबार बेलुका आइपुग्ने कम्पनीले जनाएको छ ।

पोखरामा साउन पहिलो सातादेखि ग्यास अभाव सुरु भएको थियो । प्रशासनले कालोबजारी रोक्न र आपूर्ति सहज बनाउन अनुगमनलाई तीव्र बनाएको छ । उपभोक्ता अधिकारकर्मी प्रेमलाल महर्जनले मागअनुसार आयात बढाउनुपर्ने र वितरण प्रणाली सुधार गर्नुपर्ने बताएका छन् ।

आयल निगमका कार्यकारी निर्देशक नागेन्द्र साहले सबै संयन्त्र परिचालन गरी साउन महिनाभित्रै आपूर्ति सहज बनाउने काम भइरहेको दाबी गरेका छन् । देशभरका ग्यास उद्योगमा निगमका प्रतिनिधि खटाइएका छन् भने भारतीय आयल कर्पोरेसनलाई पनि आयात बढाउन आग्रह गरिएको छ ।उद्योगमन्त्री गौरीकुमारी यादवले शनिबार काठमाडौंका केही ग्यास डिपो निरीक्षण गर्दै महिला र विद्यार्थीलाई लाइनमा नबसी ग्यास पाउने वातावरण सिर्जना गर्न निर्देशन दिएकी छन् ।