काठमाडौँ, १५ साउन । प्रहरी हेडक्वार्टरले सुनसरीबाट सुरु भएको प्रदर्शन र त्यसपछि उत्पन्न संवेदनशील परिस्थितिलाई मध्यनजर गर्दै कुनै पनि किसिमका अफवाह नफैलाउन सर्वसाधारण तथा सरोकारवालाहरूसँग आग्रह गरेको छ। देशको शान्ति र सुरक्षा अवस्थालाई सामान्यीकरण गर्न सबै पक्षबाट संयम र परिपक्वता प्रदर्शन हुनुपर्नेमा प्रहरीको जोड छ।

प्रहरी प्रवक्ता (डीआईजी) अबिनारायण काफ्लेले एक भिडियो सन्देश जारी गर्दै सुनसरी र मधेस क्षेत्रमा भइरहेका गतिविधिहरूका सन्दर्भमा आधारहीन कुरा र अफवाहको पछि नलाग्न अनुरोध गरेका छन्। सामाजिक सद्भाव खलबल्याउने खालका गतिविधिबाट टाढा रही आ–आफ्नो ठाउँबाट जिम्मेवार भूमिका निर्वाह गर्न उनले सबैलाई अपिल गरेका छन्। राष्ट्रिय एकतालाई सर्वसञ्चै राखी शान्ति सुरक्षा कायम राख्न सबैको परिपक्व र संयमित व्यवहार आवश्यक रहेको उनको भनाइ छ।

यसैबीच, गृहमन्त्री सुधन गुरुङ सिरहा जिल्ला प्रस्थान गरेका छन्। यसअघि बिहीबार राति सुनसरी पुगेर गृहमन्त्री गुरुङले मृतकका परिवारसँग ७ बुँदे सहमति गरिसकेका छन्। हाल सिरहा पुगेका गृहमन्त्रीले त्यहाँका मृतकका परिवार, घाइते तथा सरोकारवालाहरूसँग प्रत्यक्ष भेटघाट गरी उनीहरूका माग र चासोलाई सम्बोधन गर्न आवश्यक पहल र सहजीकरण गर्ने प्रहरी प्रवक्ता काफ्लेले जानकारी दिएका छन्।