चितवन, ८ असार । राष्ट्रिय स्वतन्त्र पार्टी (रास्वपा)को केन्द्रीय सदस्य पदका लागि उम्मेदवारी घोषणा गरेका निर्मल गौतम यतिबेला चर्चामा छन् । पर्वतको कुश्मा नगरपालिका–१२, ठूलीपोखरीमा जन्मिएका गौतमको राजनीतिक यात्रा र उनको व्यावसायिक पृष्ठभूमिको फेहरिस्त निकै प्रभावशाली छ । एक सामान्य किसान परिवारमा हुर्किएका गौतमले प्रारम्भिक शिक्षा गाउँमै पूरा गरेर वाणिज्य शास्त्रमा स्नातकोत्तर तहसम्मको अध्ययनलाई निरन्तरता दिइरहेका छन् ।

गौतमको व्यावसायिक जीवनको सुरुवात निकै कलिलो उमेरमा भयो । २३ वर्षकै उमेरमा नेपाल राष्ट्र बैंकबाट इजाजत प्राप्त वित्तीय संस्थाको उच्च पदमा रही उनले आफ्नो क्षमता सावित गरिसकेका थिए । विभिन्न लघुवित्त वित्तीय संस्थाहरूमा लेखापरीक्षण विभागको प्रमुख तथा कम्पनी सचिवको भूमिका निर्वाह गरिसकेका गौतमले कार्यकुशलताकै कारण गण्डकी प्रदेशको सहकारी रजिष्ट्रार कार्यालयमा वित्तीय विश्लेषक तथा परामर्शदाताको जिम्मेवारीसमेत पाए । साढे तीन वर्षको अवधिमा उनले ७९ वटा सहकारीको अनुगमन गर्दै वित्तीय अपराधका जटिल विषयहरूको पर्दाफास गरे ।

विशेषगरी सहकारी ठगी र वित्तीय अपराध अनुसन्धानमा उनको योगदान अतुलनीय छ । उनले अनुसन्धान गरेका २७ वटा ठूला सहकारी ठगी प्रकरणबाट हजारौँ पीडितले न्याय पाउने बाटो खुलेको छ । बागलुङ, कास्की, नवलपुर, लमजुङ र स्याङ्जाका जिल्ला प्रहरी कार्यालयहरूसँगको समन्वयमा उनले कुल ८ अर्ब ५० करोड रुपैयाँभन्दा बढीको हिनामिना प्रकरणमा प्रमाण जुटाएर राज्यलाई अर्बौंको अवैध रकम करको दायरामा ल्याउन महत्वपूर्ण भूमिका खेलेका थिए । यसबापत उनी विभिन्न जिल्ला प्रहरी कार्यालयहरूबाट पटक–पटक सम्मानितसमेत भइसकेका छन् ।

सहकारी क्षेत्रको अराजकतालाई चिर्दै आर्थिक पारदर्शिता र सुशासन स्थापना गर्ने दृढ अठोट बोकेका गौतम अब देशको नीति निर्माणको तहमा पुग्ने लक्ष्यका साथ रास्वपाको राजनीतिमा होमिएका हुन् । उनी स्थानीय तहमा म्युनिसिपल बन्ड वा ऋणपत्रमार्फत आर्थिक स्वायत्तता बढाउने, सामाजिक उद्यमशीलतालाई प्रोत्साहन गर्ने र प्रशासनिक अनुभवको प्रयोग गर्दै कानुनी राज्यको स्थापना गर्ने सपना देख्छन् । विशेषगरी अपराधको लाभग्राही केन्द्रित कानुन निर्माणमा उनको जोड छ, जसले मात्र वित्तीय अपराधीहरूलाई कारबाहीको दायरामा ल्याउन र भविष्यमा यस्ता घटना हुन नदिन सकिन्छ ।

रास्वपाको केन्द्रीय समितिमा आफ्नो उम्मेदवारी किन भन्ने प्रश्नमा उनी स्पष्ट छन् । राजनीतिमा प्राविधिक दक्षता, नैतिकता र इमान्दारिताको खाँचो रहेको औँल्याउँदै उनी प्रशासनिक तथा सांगठनिक उचाई निर्धारण गर्न नयाँ प्रविधि र रणनीतिक सोचको आवश्यकता रहेको बताउँछन् । स्थानीय तहलाई बजेटमुखी र आत्मनिर्भर बनाउने आर्थिक मोडलसहित पार्टीको न्यायपूर्ण समाजको सपनालाई साकार पार्न आफू कटिबद्ध रहेको उनको भनाइ छ । वित्तीय अपराधको चिरफार गर्ने आफ्नो अनुभवलाई पार्टीको नीति र मुलुकको सार्वजनिक सेवा सुधारमा प्रयोग गर्ने अठोटसहित उनी रास्वपाको केन्द्रीय सदस्य पदको प्रतिस्पर्धामा उत्रिएका हुन् ।