काभ्रे, जेठ ३० गते । बीपी राजमार्गअन्तर्गत काभ्रेको नमोबुद्ध नगरपालिका–२, सेल्फीडाँडामा शुक्रबार भएको भयावह बस दुर्घटनामा ज्यान गुमाउने आठै जनाको सनाखत भएको छ। बनेपाबाट रोशी गाउँपालिका–६, सुँगुरे जाँदै गरेको बा३ख ८३९८ नम्बरको यात्रुवाहक बस सडकबाट करिब ५ सय मिटर तल खस्दा उक्त दुर्घटना भएको थियो।

जिल्ला प्रहरी कार्यालय काभ्रेका सूचना अधिकारी एवम् प्रहरी नायब उपरीक्षक रविन विष्टका अनुसार दुर्घटनामा परी ज्यान गुमाउनेहरूमा रोशी गाउँपालिकाका ६ जना, नेपाली सेनाका एक जवान र सिन्धुलीका एक जना रहेका छन्।

मृत्यु हुनेहरूमा रोशी गाउँपालिका–६ का ७३ वर्षीय मेघबहादुर तामाङ, ७५ वर्षीय इन्द्रबहादुर तामाङ र ५५ वर्षीय राजु तामाङ रहेका छन्। त्यस्तै, सोही गाउँपालिका वडा नं. ७ का ३४ वर्षीया फूलमाया तामाङ, ६० वर्षीया माया लामा र वडा नं. ८ की ६० वर्षीया प्यारीमाया तामाङको पनि घटनामा परी निधन भएको छ।

यसैगरी, दैलेख घर भई नेपाली सेनामा अमल्दार पदमा कार्यरत ३० वर्षीय बमबहादुर भण्डारी र सिन्धुलीको घ्याङलेख गाउँपालिका–४ की २२ वर्षीया सुमी लामाले पनि ज्यान गुमाएका छन्।

दुर्घटनाको खबर प्राप्त हुनासाथ नेपाल प्रहरी, सशस्त्र प्रहरी बल, नेपाली सेना र स्थानीयवासीको संयुक्त प्रयासमा उद्धार कार्य गरिएको थियो। दुर्घटनामा घाइते भएका अन्य १५ जनालाई तत्काल उद्धार गरी धुलिखेल अस्पताल लगिएको र उनीहरूको त्यहीँ उपचार भइरहेको प्रहरीले जनाएको छ।

प्रहरीले घटनाको अनुसन्धान भइरहेको जनाएको छ। हाल मृतकका आफन्तहरूसँग सम्पर्क गरी आवश्यक कानुनी प्रक्रिया अगाडि बढाइएको जिल्ला प्रहरी कार्यालय काभ्रेले जानकारी दिएको छ। एकाएक भएको यो दुखद घटनाले सिंगो रोशी गाउँपालिकालाई शोकमा डुबाएको छ।