पोखरा, २९ जेठ । जिल्ला प्रहरी कार्यालय कास्कीले लागू औषध विरुद्धको अभियानमा ‘कठोर प्रहार’ गर्दै एकै महिनामा ठूलो सफलता हासिल गरेको छ। जेठ महिनामा मात्रै १४ वटा छुट्टाछुट्टै लागू औषध सम्बन्धी मुद्दा दर्ता गरी प्रहरीले कारोबारमा संलग्न २० जनालाई नियन्त्रणमा लिएको छ।

जिल्ला प्रहरी कार्यालय कास्कीले शुक्रबार आयोजित पत्रकार भेटघाट तथा अन्तरक्रिया कार्यक्रममा सार्वजनिक गरेको तथ्यांक अनुसार, पक्राउ पर्नेहरूमा १८ पुरुष र २ महिला रहेका छन्। प्रहरीको विशेष अपरेशनका क्रममा बजारमूल्य करोडौं पर्ने विभिन्न प्रकारका लागू औषध बरामद गरिएको कास्की प्रहरी प्रमुख एसपी नविन कार्कीले जानकारी दिए ।

प्रहरीको कारबाहीमा ८ केजी ४५० ग्राम गाँजा, ३९,८९९ ट्याब्लेट ट्रामाडोल/टापेन्टाडोल, १,००० थान एलएसडी, ९३ एम्पुल फेनेरागन, ८० एम्पुल ब्रुफिनर्फिन, ६८ एम्पुल डाइजापाम र ५ ग्राम ७५ मिलिग्राम खैरो हिरोइन (ब्राउन सुगर) बरामद भएको छ।

कास्की प्रहरीको सक्रियताले लागू औषधको अन्तरदेशीय सञ्जालमा पनि प्रहार गरेको छ। पोखरा–७ शहिदचोकबाट १,००० थान एलएसडीसहित एक भारतीय नागरिक पक्राउ परेका छन्। त्यसैगरी, पोखरा–२९ तालचोकमा ३१.२ ग्राम ब्राउन सुगरसहित एक महिला पक्राउ पर्नु र प्रस्याङबाट हजारौंको संख्यामा टापेन्टाडोल ट्याब्लेट बरामद हुनुले पोखरालाई लक्षित गरी भइरहेको ठूलो कारोबारको जालोलाई समयमै चिर्न सकेको कास्की प्रहरीका प्रवक्ता डीएसपी विरेन्द्रकुमार पासवानले जानकारी दिएका छन् ।

जेठ महिनामा लागू औषध मात्र नभई अन्य आपराधिक गतिविधिमा पनि कास्की प्रहरीले उल्लेख्य सक्रियता देखाएको छ। यस अवधिमा कुल २०६ वटा मुद्दा दर्ता भएका छन्, जसमा बैंकिङ कसुर (६६), अभद्र व्यवहार (४०) र ठगी (२०) का घटनाहरू धेरै छन्।

त्यसैगरी, प्रहरीले ६५ जना फरार प्रतिवादीहरूलाई पक्राउ गरेको छ भने चोरीको अभियोगमा युगान्डाका ५ नागरिकसहित सुनका गहना चोरीमा संलग्न गिरोहलाई पनि कानुनी दायरामा ल्याएको छ। सहरको अस्तव्यस्ततालाई कम गर्न फुटपाथमा जथाभावी पार्किङ गरिएका एकहजार ६० वटा सवारी साधनलाई नियन्त्रणमा लिई ट्राफिक व्यवस्थापनमा पनि प्रहरीले कडा कदम चालेको छ।

जिल्ला प्रहरी कार्यालय कास्कीका अनुसार, यी कारबाहीहरूले समाजमा सुरक्षाको अनुभूति दिलाउन र पोखरालाई अपराधमुक्त बनाउन महत्त्वपूर्ण भूमिका खेल्नेछन्। प्रहरीले लागू औषध र अन्य गैरकानुनी गतिविधिमा शून्य सहनशीलता अपनाउँदै थप सतर्कता बढाएको छ।