पोखरा, २४ वैशाख । विगत २० वर्षदेखि नेपाललाई आफ्नो गन्तव्य बनाउँदै आएका ७० वर्षीय जर्मन नागरिक पिटरमाथि नाबालकमाथि ‘अप्राकृतिक मैथुन’ गरेको भन्दैं गम्भीर बालयौनजन्य हिंसा गरेको आरोप लागेको छ।

पर्यटक भिसामा नेपाल आएका पिटरले बालकहरूलाई जर्मनी लैजाने र शैक्षिक सहयोग गर्ने आवरणमा यौनजन्य हिंसा गरेको भन्दै प्रहरीमा जाहेरी परेपछि यस घटनाले नयाँ मोड लिएको छ।

यस घटनामा पोखरा लेकसाईडस्थित एक होटलका जनरल म्यानेजर (जीएम) पदम न्यौपानेको पनि संलग्नता देखिएको छ । पदमले नै पिटरका लागि बालकहरू मिलाइदिने, उनीहरूलाई होटलसम्म ल्याउने र बस्ने व्यवस्था मिलाउने गरेको आरोप लागेको छ।

न्यौपानेले काम गर्ने होटलहरुमा विगतदेखि नैं यस्तै धन्दा गर्दै आईरहेको उजुरीमा उल्लेख विषय र पिटरसँगको उनको अस्वभाविक सम्बन्धले झन् शंकाको दायरालाई फराकिलो बनाउँदैं लगिरहेको छ ।

पिटर र पदमबीचको लामो समयदेखिको निकटता र कार्यशैलीले गर्दा यो संगठित अपराध हुन सक्ने आधारहरू देखिएका छन्। प्रहरीले होटलका कोठाहरूमा बालकलाई राखी अप्राकृतिक मैथुन गराउन न्यौपानेले नै वातावरण मिलाइदिएको विषयमा अनुसन्धान गरिरहेको स्रोतले जानकारी दिएको छ । यो आरोपका सम्बन्धमा न्यौपानेसँग थप वास्तविकता बुझ्न खोज्दा सम्पर्क हुन सकेन ।

यद्यपि, पिटरले भने आफूमाथि लागेका सबै आरोपहरू अस्वीकार गरेका छन्। उनले पीडित भनिएका नाबालकसँग आफ्नो सम्बन्ध ‘हजुरबुबा र नाति’को जस्तो स्नेहपूर्ण रहेको र कुनै पनि यौनजन्य कार्य नगरेको जिकिर गर्दै आईरहेका छन् ।

जाहेरीमा होटलको कोठामा मदिरा खुवाएर अश्लील भिडियो देखाउँदै यौनशोषण गरेको उल्लेख छ। तर, पिटरले भने बालक आफूसँग पैसा माग्न मात्र होटल आउने गरेको र उल्टै बालकले नै मोबाइलमा अश्लील क्रियाकलाप गर्ने गरेको आरोप लगाएका छन्।

अनुसन्धानका क्रममा पिटरले नेपाली बालकहरूलाई जर्मनी लैजाने गरेको खुलेको छ। सन् २०२५ सेप्टेम्बरमा उनले ती नाबालकलाई जर्मनी लगेर ७ हप्ता राखेका थिए। त्यहाँ ‘होमवल्ड स्कुल’को भ्रमण गराएको र खेलकुद सिकाएको उनले बताएका छन्। यसअघि पनि उनले दुई युवालाई जर्मनी लगिसकेका छन्, जो अहिले त्यहीँ स्थापित छन्।

नेपालमा रहँदा उनले पोखराको श्री सृजना माध्यमिक विद्यालयमा स्वयंसेवक शिक्षकको रूपमा काम गरेको र बालकहरूको स्कुल शुल्क तिरिदिने गरेको भन्दै आफ्नो छवि ‘समाजसेवी’को रूपमा स्थापित गर्न खोजेको देखिन्छ।

पछिल्लो पटक २० अप्रिल २०२६ मा नेपाल आएका पिटर पोखराका हिमालयन देउराली रिसोर्ट लगायतका स्थानमा बस्दै आएका थिए। होटलका कोठाहरूमा बालकहरूको अनियन्त्रित आवतजावत र होटल व्यवस्थापनको शंकास्पद भूमिकाले गर्दा यो घटनालाई ‘बाल यौन दुराचार’ र ‘मानव बेचबिखन’को कोणबाट प्रहरीले अनुसन्धान अघि बढाईरहेको छ ।

प्रहरीले अहिले पिटरको मोबाइल, होटलको सीसीटीभी फुटेज र विचौंलिया तथा सहयोगी पदम न्यौपानेसँगको सम्बन्धबारे सुक्ष्म अनुसन्धान गरिरहेको छ। ‘परोपकार’को नाममा विदेशी नागरिकबाट हुने यस्ता गतिविधिले पोखराको पर्यटन र बाल सुरक्षामाथि नै गम्भीर प्रश्न खडा गरिदिएको छ।