पोखरा, २० वैशाख । पोखरामा ललाई–फकाई बालिकाको सुनको मुन्द्रा चोरी गर्ने एक महिला पक्राउ परेकी छिन्। पक्राउ पर्नेमा स्याङ्जा चापाकोट नगरपालिका–३ स्थायी घर भई हाल पोखरा–१० रामबजार बस्ने २५ वर्षीया अम्बिका पुलामी मगर रहेकी छिन्।

गत २०८३ वैशाख ६ गते पोखरा महानगरपालिका–२५, हेम्जा रामचोकमा ६ वर्षीया बालिकालाई ‘तिमीलाई ममीको साथी हुँ’ भनी झुक्याएर र जुस/आइसक्रिम जस्ता खानेकुराको प्रलोभन देखाई कानमा लगाएको दुई थान सुनको मुन्द्रा (अन्दाजी १ लाख मूल्य बराबरको) चोरी गरी फरार भएकी थिइन्।

घटनास्थलको सीसीटीभी फुटेजका आधारमा प्रहरीले अनुसन्धान गर्दा उनी एवान मोटरवाईक रेन्टल एण्ड टुर्सबाट भाडामा लिइएको ग २५ प ३५८४ नम्बरको स्कुटर प्रयोग गरी फरार भएको खुलेको थियो। प्रहरीले उनलाई २०८३ वैशाख १७ गते पोखराको महेन्द्रपुलबाट पक्राउ गरेको हो।

अघिल्ला १८ मुद्दामा दोषी, कैद तथा जरिवाना भुक्तान गर्न बाँकी
प्रहरीको सीआरएस चेक गर्दा पक्राउ परेकी मगर विगतमा पनि चोरी तथा डाँका सम्बन्धी कसुरमा संलग्न रहेको पाइएको छ। सम्मानित कास्की जिल्ला अदालतबाट चोरी तथा डाँका सम्बन्धी १८ वटा विभिन्न मुद्दामा उनी दोषी ठहर भई कैद तथा जरिवाना भुक्तान गर्न बाँकी रहेको तथ्य सार्वजनिक भएको छ।

पक्राउ परेकी मगरलाई हाल चोरी तथा डाँका सम्बन्धी कसुरमा ७ दिनको म्याद थप गरी थप अनुसन्धान भइरहेको जिल्ला प्रहरी कार्यालय कास्कीले जनाएको छ।