पोखरा, १५ कात्तिक । नेत्रविक्रम चन्द ‘विप्लव’ नेतृत्वको कम्युनिष्ट पार्टी नेपालले जेन–जीमाथि भएको दमनको निष्पक्ष छानबिनको माग गर्दै आज शनिबार देशव्यापी रुपमा मसाल जुलुशको प्रदर्शन गरेको छ । सोही क्रममा पोखराको जिरोकिलोमिटर नजिकैं कम्युनिष्ट पार्टी नेपालका कार्यकर्ताहरुले मसाल जुलुश प्रदर्शन गर्दै नाराबाजी गरेका छन् ।

पार्टीको विशेष बैठकबाट पारित संघर्षका कार्यक्रमहरु अनुसार कात्तिक १७ गते देशव्यापी विरोध प्रदर्शनसहित कोणसभा र २० गते काठमाडौंमा बृहत जनसभाको आयोजना गर्ने कार्यक्रम रहेको विद्यार्थी संगठन अखिल (समाजवादी)का केन्द्रीय सचिव तथा गण्डकी प्रदेशका इञ्चार्ज युवा नेता प्रकाश बास्तोला ‘मार्शल’ले जानकारी दिए । यसअघि पार्टीले कात्तिक १३ गते भित्ते लेखन कार्यक्रम सम्पन्न गरिसकेको उनले बताए ।
आज भएको मसाल जुलुश प्रदर्शनमा ‘जेन–जीमाथि भएको दमनको निष्पक्ष छानबिन गर’, ‘सर्वपक्षीय अन्तरिम सरकार गठन गर’, ‘भ्रष्टाचारको निष्पक्ष छानबिन गर्न उच्चस्तरीय छानबिन आयोग गठन गर’, ‘भ्रष्टाचारीहरूलाई कारबाही गर्न विशेष न्यायालय गठन गर’, ‘अग्राधिकारसहितको समाजवाद निर्माण गर’, ‘दलाल प्रकृतिका गैरसरकारी संस्थाहरू खारेज गर’ र ‘युवाहरूको लागि रोजगारीको ग्यारेन्टी गर’ लगायतका नाराहरु लगाइएको थियो ।