काठमाडौं, १० कार्तिक । प्रधानमन्त्री सुशीला कार्कीले छठ पर्वको अवसरमा शुभकामना व्यक्त गर्दै राष्ट्रिय एकता, सामाजिक सद्भाव र लोकतान्त्रिक प्रक्रियाप्रति प्रतिबद्ध रहन सबै नेपालीलाई अपिल गरेकी छन्।

आफ्नो शुभकामना सन्देशमा प्रधानमन्त्री कार्कीले छठ पर्वले सत्य, अहिंसा र प्रकृतिप्रेमको सन्देश बोकेर तराई र पहाडबीच सांस्कृतिक तथा सामाजिक एकताको सेतुको रूपमा काम गरेको उल्लेख गरेकी छन्। “हाम्रा चाडपर्वहरूले सामाजिक एकता र भ्रातृत्वको आधार प्रदान गर्छन्। अहिलेको समयमा नेपालीहरूबीच थप एकता र सद्भावको आवश्यकता छ,“ उनले भनेकी छन्।

प्रधानमन्त्रीले आगामी फागुन २१ गते हुने प्रतिनिधि सभा निर्वाचनलाई ’राष्ट्रिय अनुष्ठान’ का रूपमा ग्रहण गरी सफल बनाउन सबै राजनीतिक दल, नागरिक र सरोकारवालालाई आह्वान गरेकी छन्। उनले हालको राजनीतिक अस्थिरता र जेनजी आन्दोलनपछिको परिस्थितिलाई सामान्यीकरण गर्न निर्वाचन अपरिहार्य भएको बताएकी छन्।

“सडक प्रदर्शनले मात्र सबै समस्याको समाधान हुँदैन। असन्तुष्टि वा अडानलाई शान्तिपूर्ण रूपमा राखेर जनताको मन जित्दै निर्वाचनमार्फत अनुमोदन गराउनु लोकतन्त्रको उत्कृष्ट बाटो हो,“ उनले जोड दिएकी छन्।

साथै, उनले सबै पक्षलाई परिस्थितिको संवेदनशीलता बुझेर जिम्मेवारीपूर्वक सहकार्य गर्न आग्रह गरेकी छन्। छठ पर्वको पवित्र आस्था, कठिन व्रत र सजाइएका नदी–तलाउका किनारमा देखिने उत्सवले नेपाली समाजमा सद्भाव र सुख फैलियोस् भन्ने उनको कामना छ।